![](https://zrumbesh.com/wp-content/uploads/2024/03/1000271942.jpg)
مرگاپ ءِ شھیدانی یات ءَ ‘درونت ءُ آشوبی گل ءِ بنگپ ءِ سر ءَ بنجاھی ھیلکاری ءُ گل ءِ نیادانی دْرچ برجاہ اِنت۔اے بابت ءَ چارُمی ءُ پنچُمی نیاد ءَ شھید راشد ھنکین مشکے ءُ آواران ھنکین ءِ باسکاں بھر زُرتگ۔
نیاد ءَ بنجاھی رسانکدری کارگشاد کازی داد ریھان، گھبودی کارگشاد ماسٹر زپر، شھید راشد ھنکین ءِ سروک استاد مھران، کلانھیں باسک مھمد رپیک ءُ ماما انور ءَ تران کُرتگ۔
دو جتائیں جاھاں بیتگیں ھیلکاری ءُ گل ءِ نیاداں باسک ءُ دوزواھاں بھر زرتگ۔
ترانکاراں گْوشتگ کہ بی این ایم یک آشوبی گلے، چہ شھید پِدا ءِ وڑیں راھشونے ءِ میراس ءَ رس اِتگیں لیکہ، ”آشوب در آشوب داں سوبمندی ءَ” ءِ رد ءَ بی این ایم بلوچستان ءِ آجوئی ءِ واب ءِ سرجم بیگ ءَ پد ھم بلوچ چاگرد ءِ تہ ءَ برابری ءُ داں برابری ءِ برجاہ دارگ ءَ وتی جُھد ءَ برجاہ دار ایت۔ مارا یات کنگی اِنت کہ بی این ایم ایوک ءَ یک زمین ئِے ءِ ٹکر ءِ آجوئی ءَ نہ لوٹ ایت بلکیں بلوچ راج ءِ مردمی بنیاد ءَ آجوئی ءِ لوٹوک اِنت کہ اود ءَ پدریچ، ٹک، جنین ءُ مردینی بھر ءُ بانگ ءَ ابید ھرچ مردم برابر ءُ آجو بہ بیت۔
آیاں گْوشتگ کہ گل ءِ سروکاں پہ گپ ءُ تران کنگ ءَ مدام ساڑی بیگی اِنت ءُ باسکاں اے ھک ھست کہ آیانی زاتی زندگی ءُ کِرد ءِ بابت ءَ تچکی ءَ نگد بہ کن اَنت۔ ما ھرچی کہ گْوش ایں باید ھما وڑ بہ کن ایں۔اگاں یک باسکے جنجالے ءِ تہ ءَ اِنت،ناگیگ اِنت ءُ ناگیگیں زندگی یے گوازینگ ءَ اِنت ءُ سروک وشھال اِنت گڑا آئی ءِ ھک اِنت کہ اے پرک ءُ ترک ءِ بابت ءَ جست بہ کنت کہ پرچہ چوش اِنت ؟ ، بلے اے پرچہ ءِ پسو ءَ ھم دلگوش بہ کنت۔ گھتریں روِشت ءُ پگرے ردوم بہ دنت۔
ترانکاراں گْوشتگ کہ لس راجداریں باسک ھم وتی چاگرد ءِ تہ ءَ یک لس مردمے نہ اِنت بلکیں یک گچینی مردمے کہ راجی لیکھے ءِ واھند اِنت، کہ چہ وتی زاتی زندگی ءِ جاہ ءَ دُرسانی زندمان ءِ سر ءَ پگر مند اِنت، چہ وتی کھول ءُ زھگاں گیش وتی توان ءَ پہ راجی وشھالی ءَ ھرچ کنت ءُ یک آشوبی راجداریں باسکے چہ لس راجداریں باسک ءَ گیش بار بڑّ ءَ کنت، پمشکا آئی ءَ وتی کِرد گھتر کنگی اِنت۔یک آشوبی یے دروگ بند، پندل باز، بے ایمان ءُ بد زبانے نہ بیت ءُ مارا چہ ھمے چیزاں وت ءَ پھریزگی اِنت۔
آیاں گْوشتگ کہ جنین مئے چاگرد ءِ نیم بھر اَنت اگاں ما آیاں جُھد ءِ بھر جوڑ مہ کن ایں گڑا بزاں ما وتی آبادی ءِ نیم بھر ءَ چہ جُھد ءَ دور کنگ ءُ دژمن ءَ نپ دیگ ءَ ایں۔ بلوچ جنین وتی کِرد ءِ راجداری جوڑ کنگ ءِ ھواری ءَ دیمروئی کُرتگیں چاگردے ءِ جنینانی وڑ ءَ وت ءَ سوھو جوڑ بہ کن اَنت۔ بوان اَنت ءُ راجداری جاوراں بزان اَنت۔ بی این ایم کہ ھما برابری ءِ لوٹوک اِنت اے چاگرد ءِ تہ ءَ جنینانی برابری بنداتی لوٹ اِنت۔
ترانکاراں گْوشتگ کہ مرگاپ ءِ شھیدانی دیمونی مارا یات پِرین اَنت کہ ما یک ٹوھیں جُھدے ءِ بھر ایں۔مئے سروک ءُ بی این ایم ءِ ھمبلاں زوراکی، کید ءُ بند بیتگ اَنت بلے چہ جُھد ءَ وتی ھمگرنچی اِش برجاہ داشتگ۔