آشوبی ھیل ءُ زرمبشت ءِ ھمبلانی میان ءَ مھر مارا ھاٹیگ بکش ایت۔ چہ ایشی ءَ مارا توان رس ایت ءُ ما اے گران ءُ دراجکشیں سپر ءِ گم ءُ وشیاں گوں تھمبل ءَ گوازینگ ءَ ایں۔ شھید واجہ گلام مھمد ءَ مارا دیمونی دیگ ءِ سکین داتگ ءُ بی این ایم ءِ ھمک ھمبل پہ آجوئی جنز ءَ دیمونی دیگ ءَ اِنت۔
اے تران بلوچ راجی زرمبشت ( بی این ایم ) ءِ نیمگ ءَ مرگاپ ءِ شھیدانی یاد ءَ برجاھیں ” درونت ءُ آشوبی گل “ ءِ بنگپ ءَ نیادانی درچ ءِ سیمی نیاد بوتگ۔
اے نیاد ءَ بی این ایم ءِ بنجاھی رسانکدری کارگشاد کازی داد مھمد ریھان ءُ کلانھیں باسک ماما انور ءَ تران کرتگ۔
آیاں گوشتگ کہ بی این ایم ءِ آشوبی سیاسی باسک پہ وتی پھریزگ ءَ جوانیں کردے پیلو کنگ ءَ اَنت۔راجی گوستانکانی میان ءَ راج گنتریں جاورانی دیمپانی ءَ کن اَنت۔ بلوچ ھم گوست ءُ انوں ناگیگیں جاورانی دیمپان اِنت۔ بلے بی این ایم ءِ برورد اِنت کہ جھدکارانی جنجال کم اَنت۔ مارا اے کار ءِ سر ءَ ھورتچاری کنگ لوٹ ایت۔ ما یک انچیں آجوئیں بلوچستانے لوٹ ایں کہ اود ءَ انساپ ءُ برابری ءِ نزام برجاہ بہ بیت۔ مئے لڑانی تہ ءَ سیاد دوست، جنگی مناپک ءُ پہ ناشریں مردماں ھچ وڑ ءَ جاگھ پشت مہ کپ ایت۔ شھید گلام مھمد ءَ مدام گوشتگ کہ بی این ایم راھشونانی نہ بلکیں باسکانی پارٹی اِنت کہ وتی پارٹی ءُ راجی زرمبشت ءِ پھازدار اَنت۔
آئی ءَ گوشتگ کہ دمگ ءِ جاور مٹ بوگ ءَ اَنت، روچ ھم مٹ بوگ ءَ اَنت مئے ھک ءَ بوت کن اَنت مئے بگیری ءَ ھم بنت، بلے مارا پہ ھر وڑیں جاوراں سسائی پارست ءَ ساجو بوگی اِنت۔ آشوبی باسک ایوک بہ بیت بلے انگت ءَ چہ وتی منزل ءُ مول ءَ پدکنز نہ بیت۔ مارا وتی ھمبل مھکم کنگ ءُ وتی ھم پگریں ھمبل ودی کنگ لوٹ اَنت کہ آ زرمبشت ءَ نوک بہ کن اَنت۔
آیاں گوشتگ کہ زرمبشت ءِ میان ءَ جنینانی کرد رَد کنگ نہ بیت بلکیں آیانی کرد سکا شر گندگ بیت۔ یک ماتے آشوبی دربرجاھے ءِ کرد ءَ پیلو کنت۔ مارا مئے ماتاں بلوچی ءِ سکین داتگ، ھمے ھیل داتگ کہ ما کجام داب ءَ شریں بلوچ ءُ شریں مردم بہ بہ ایں۔ مارا وتی مات، گھار ءُ جنین ئیں ھمبلانی کرد ءِ سر ءَ پھر اِنت ءُ آدگہ راج ھم بلوچ جنینانی سیاسی ءُ آشوبی کرد ءَ آشنا اَنت۔ جنیناں تیوک ءَ جنین ءِ بنیاد ءَ نہ بلکیں سیاسی باسک ءِ پارست ءَ بلوچ چاگرد ءِ تہ ءَ وتی کرد ءَ پیلو کنگ لوٹ ایت۔
آیانی گوشگ اِنت کہ آشوبی ھمبل شھید لالا منیر ءِ کرد ءَ چار ئے آئی وتسر ءُ ٹکی سوچ پروش داتگ، بلوچ چاگرد ءَ آئی جوانیں جاھے گپتگ کہ مرچی آئی ءَ تیوگیں بلوچ راج وتی بامرد لیک ایت۔ ھمے وڑ ءَ شھید شیر مھمد ءُ گلام مھمد درسیں نپ یل داتگ اَنت ءُ زنداناں آزار ءُ زوریں بیگواھی اوپار کرتگ ءُ وتی جانانی دیمونی داتگ پمیشکا کہ بلوچ راجی زرمبشت ءَ اے میان ءَ لوٹانی بنیاد ءَ دیمونی درکار بوتگ۔
