مرگاپ ءِ شھیدانی یاد کنگ ءِ درگت ءَ ” درس ءُ آشوبی گل“ ءِ بنگپ ءَ بلوچ راجی زرمبشت ( بی این ایم ) ءِ ھیلکاری نیادانی درچ ءَ بنداتی نیاد آواران۔ مشکے ھنکین ءَ برجم دارگ بوتگ، ایشی ھمے ھنکین ءُ پنجگور ھنکین ءِ جتائیں بنزھانی باسکاں بھر زرتگ۔
پروگرام ءَ بنجاھی رسانکدری کارگشاد کازی داد مھمد ریھان، بنجاھی کلیتدار ناسر، مردمی ھکانی کارگشاد ڈاکٹر نازر نور ءُ پارٹی ءِ کلانھیں باسک ماما انور تران کرتگ۔
آیاں گوشتگ کہ واجہ گلام مھمد زرمبشت سیاسی ادارھانی دروشم ءَ مھکم کرتگ ءُ اے درچ ءِ دیم ءَ برگ ءَ جوانیں کردے پیلو کرتگ۔ دژمن ءَ گلام مھمد ءِ شھید کنگ ءَ ابید آئی لیکہ ھلاس کرت نہ کرتگ۔ مرچی اد ءَ آئی کاروان ءِ گون ءَ ھمگرنچیں سیاسی کارکن ھزارانی کچ ءَ پہ بلوچ آجوئی زرمبشت ءِ سوبمند کنگ ءَ جھد ءَ اَنت۔
آئی ءَ گوشتگ کہ بلوچ چاگرد ءَ آشوبی مٹی آتکگ، چہ کسانیں زھگاں بگر داں پیریں کماشاں راجی زانشت ءَ چکار اَنت وتی ایردستی اِش مارتگ۔ نوں بلوچ راج ءَ ایردست کنگ ءُ چہ وتی زرمبشت ءَ دزکش کنگ نہ بوھگی کارے۔ بلے مارا مدام مھکم بوگ ءُ وتی زرمبشت پھریزگی اِنت۔ شھید واجہ گلام مھمد ءَ گوشتگ کہ چہ چنچو برزی ءَ بہ کپ ئے ھمچو تاوان بیت۔ مرچی مئے زرمبشت بزری ءِ نیمگ ءَ گام جنان اِنت مارا گیش چارگ ءُ دیم ءَ جنزگی اِنت۔
آیاں گوشتگ کہ اشتاپکاریں سیاست ءِ آسر دیر نہ کنت بلوچ راجی آجوئی ءِ زرمبشت اوپار ءُ سگ ءِ لوٹ ءَ کنت۔ ما ھر وڑیں دیمونی داتگ ءُ دیمونیانی درچ داں منزل ءَ برجاہ بیت۔ ما چہ آجوئی جنز ءَ یک گامے پشت ءَ نہ کنز ایں۔
آیاں گوشتگ کہ مارا وتسریں سیاسی کارکن بوگ ءَ ابید وتی ادارھامی پابند بوگ ءُ راھبند ءِ پارست ءَ پروگرام دیم ءَ برگی اَنت۔ ما گوست ءِ ٹکی جھد ءِ آسر ءَ سرپد ایں مرچی زرمبشت سیاسی بنیاد ءَ برجاہ اِنت پمیشکا ایشی سوبمندی شاھگان اِنت۔ ھمک جھدکار ءَ اے سرپد بوگ لوٹ ایت کہ آ گوں یک مردمے ءَ نہ بلکیں گوں لیکھے ءَ بندوک اِنت۔
