بلوچستان آجو سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں گوادر ءِ ھند دڑامب ءَ اکاڈہ ڈیم ءِ راہ ءِ سر ءَ زورگریں لشکر نشانگ کُرتگ کہ چہ ایشی ءَ ھپت کارمند مُرتگ۔
آئی ءَ گوشتگ کہ یکشمبے ءِ سُھب ءِ ھشت ءَ سرمچاراں گوادر ءَ دڑامب ءِ کوھی دمگ ءَ زورگریں پاکستانی لشکر ءِ کاروان ءِ سر ءَ گوں نوکین ءُ ٹوھیں سلاھاں اُرش کُرتگ۔ اُرش ءَ دژمن ءِ ھپت کارمند مُرتگ ءُ دو ٹپی بیتگ۔ایشی ءَ گاڑی ءُ پرپٹ ءَ باز تاوان بیتگ۔
جارکش ءَ گوشتگ کہ کاروان ءِ تہ ءَ بم ڈسپوزل ٹولی ھوار بیتگ کہ آکاڑہ ڈیم ءِ پانگسانی نیمگ ءَ روگ ءَ بیتگ کہ اود ءَ یک ٹوھیں بنجلے جوڑ کنگ بیتگ۔ سرمچاراں گوں گھتریں کارشونیاں ھال ءِ سر بیگ ءَ اُرش کُرتگ ءُ دژمن پروش داتگ۔
آئی ءَ گوشتگ کہ پہ بلوچ سرڈگار ءِ دیمپانی ءَ جنگ کنوکیں سرمچارانی زندمان ءِ مول ءُ مراد یک آجو ءُ گوں یک وشھالیں بلوچستان ئِے ءَ بندوک اِنت۔گوں وتی سرڈگار ءِ مھر ءَ سرچکاریں سرمچار پاکستانی زوگریں لشکر ءِ ھمک سُر ءُ پُر ءُ شوربندی ءِ سر ءَ چم اِش سَک اَنت ءُ ھر کجا اُرش کنگ ءِ توان اِش ھست۔
بی ایل ایپ ءِ جارکش میجر گھرام ءَ اُرش ءِ زمہ واری منّ اتگ ءُ گوشتگ کہ ھمے کول ءَ کن ایں کہ داں بلوچستان ءَ پاکستانی لشکر ءِ سرجم ءَ دراھگ ءَ اُرش برجاہ بنت۔
