سند: سندھودیش روولیوشنری آرمی (ایس آر اے) ءِ سروک کماندار ازگرشاہ ءَ مرچی 31 مارچ 2024 ءَ سندھودیش روچ ءِ درگت ءَ وتی کلوھے ءَ گوشتگ کہ ماتیں سرڈگار سندھودیش وتی ھزراں سال جتائیں گوستانک، دودمان، ھستمان ءُ جتائیں پجارے ءِ بستار ءَ دار ایت۔ چہ ایشی ءَ ابید گوستانک ءِ یک سکا جنجالیں دھرے ءَ گوزگ ءَ اِنت۔ مرچیگیں روچ ءِ درگت ءَ سائیں جی ایم سید ءَ وتی سیاسی چکاس ءُ زانت ءِ بنیاد ءَ کہ گوستانکی ءُراھبندی سوڑگے کرتگ ءُ وتی گرانبھائیں لیکہ ءُ پروگرام سندی راج ءِ دیم ءَ پیش کرتگ، مرچیگیں جاور پنجاہ سال ءِ گوزگ ءَ پد ھم راست بوتگ اَنت۔
آئی ءَگوشتگ کہ ما ھمے سرپد بہ ایں ھپتاد ءُ ھپت سال ءِ میان ءَ پاکستان ءِ نام ءَ سندی راج ءِ سر ءَ برجاھیں زوراکی ھمک آھوکیں روچ ءَ گیش ترند بوگ ءَ اَنت۔ سند سرڈگار، دریا، کور، مڈی، تیل، گیس، اشکر ءُ سند ءِ لکانی کچ ءَ ایکٹر ڈگار پنجاپ ءِ سرجم ءَ زورگپت اِنت۔ بھریہ ٹاون، ڈی ایچ اے، پزائیہ ٹاؤن، کمانڈر سٹی ءُ اے وڑیں درسیں شوربندی پہ مئے راجی پجار ءُ ھستمان ءِ سرجم ءَ تباہ ءُ برباد کنگ ءَ جوڑ بوتگ اَنت۔
ازگرشاہ ءَ گوشتگ کہ سرجمیں سند ءَ یک مھکمیں شوربندی یے ءِ پارست ءَپنجاپی ءُ آدگہ آبادکاری کنگ ءُ سندھیاں وتی سرڈگار ءِ سر ءَ گوں کمیناں مٹ کنگ ءُ نزور کنگ ءَ اَنت۔ ھمے نوک آبادکاری ءِ رد ءَ سند ءَ یک مھکیں پندلے ءِ پارست ءَ مزھبی ناشرکارانی نیٹورک جوڑ کنگ بوگ ءَ اَنت۔ سند سرڈگار ءِ سر ءَ سندی راج ءِ ایردستی ءِ سیاھیں شپ ءَ پہ دراجکش کنگ ءَ پنجاپی زورگر چین ءِ ھواری ءَ سی پیک شوربندی ءِ رد ءَ سرجمیں دریا، تیاب دپ ءُ درسیں روگ ءُ آھگ ءِ راہ دستیگ کنگ ءَ اِنت۔ چہ اے وڑیں جاوراں سند ءِ پھریزوک سائیں جی ایم سید ءِ لیکہ ءِ پیش داشتگیں سلاہ بندیں جھد اِنت۔
آئی ءَ گوشتگ کہ مرچیگیں روچ ءِ درگت ءَ ما ھمے کول ءِ راست کنگ ءَ پنجاپ ءِ زوگر ءَ پہ وتی سرڈگار ءِ آجوئی ءَ گڈی تیر ءُ داں گڈی سپاھی ءَ گھگیری ءَ برجاہ دار ایں۔ سند ءِ نہ ترسیں بچ ءُ جنک مئے گون ءَ کمک بہ کن اَنت۔ ما گوں سلاہ بندیں جھد ءَ جاورانی دیم ءَ گوں سند ءِ آجوئی ءِ گرگ ءَ سوبیں بہ ایں۔
