کراچی: زورگریں پاکستانی لشکر ءَ مھمد ھان نامیں ورنایے آوار جتگ ءُ بیگواہ کرتگ۔
اھوالکار ءِ رد ءَ زور بیگواھیں ورنا مھمد ھان ء ھاجی گنی اِنت کہ کراچی ءِ ھند ملیر کلیری ءِ جاہ منند اِنت۔ زورگریں پاکستانی لشکر ( رینجر) ءُ چیریں ادارھانی کارمنداں زی آئرن سٹی ءِ کر ءَ ھما وھد ءَ آوار جتگ کہ آ پہ دبوج ءَ سامان ءِ زورگ ءَ بازار شتگ۔
بنشون ءِ رد ءَ پاکستانی لشکر ءُ چیریں ادارھانی کارمنداں دو رند پیسر ءَ ھم آئی گس ءَ بیڑ برتگ ءُ مھمد ھان ءِ جست گپتگ بلے آ وھد ءَ مھمد ھان گس ءَ ساڑی نہ بوتگ۔
بلوچ راجی زرمبشت ( بی این ایم ) ءِ مردمی ھکانی ادارہ پانک ءَ ھم مھمد ھان ء گنی ءِ زوریں بیگواھی ءِ گپ راست کرتگ ءُ ماں چاگردی رسانکدر ءِ تندجاہ ایکس ءَ آئی اکس شنگ کرتگ ءُ آجوئی ءِ لوٹ کرتگ۔
یات بہ بہ اِت کہ چو بلوچستان ءِ وڑ ءَ کراچی ءِ بلوچ ھنداں بلوچ ورنا ھمک وھد ءَ ریاستی لشکر ءِ دست ءَ زوریں بیگواھی ءِ نشانگ بوگ ءَ اَنت۔ لھتیں ماہ پیش چہ لیاری ءَ زورگریں پاکستانی لشکر ءَ دو ورنا شھیب ءُ شاہ زمان آوار جتگ ءُ بیگواہ کرتگ اَنت کہ گوستگیں روچ ءَ آیانی ژانگولیں لاش چگل دیگ بوتگ اَنت۔
