مستونگ: زورگریں پاکستانی لشکر ءَ دو مردم گلام اللہ لھڑی ءُ سدام ھسین آوار جتگ ءُ بیگواہ کرتگ اَنت۔
اھوالکار ءِ رد ءَ 26 مارچ 2024 ءَ شپ ءِ دوازدہ ءُ نیم ءَ سی ٹی ڈی ءُ چیریں ادارھانی کارمنداں گس ءَ بیڑ برتگ ءُ گلام اللہ لھڑی آوار جتگ ءُ بیگواہ کرتگ۔
زورگریں لشکر ءَ بیڑ برگ ءِ میان ءَ گسانی پٹ ءُ پول کنگ ءِ ھواری ءَ جنین ءُ زھگ ھم زوراکیانی نشانگ کرتگ اَنت۔
کھول ءَ گلام اللہ لھڑی ءِ زوریں بیگواھی ءِ گپ راست کرتگ ءُ گوشتگ کہ آئی زوریں بیگواھی ءَ پد مارا ھچ وڑیں سرپدی دیگ نہ بوتگ آ چون ءُ کج ءَ اِنت۔
آئی گوشگ اِنت کہ گلام اللہ لھڑی ءِ سر ءَ چونیں بھتامے ھست گڑا آمیدگس ءَ پیش کنگ بہ بیت۔ اے وڑا مئے تیوگیں کھول رنجانی دیمپان اِنت۔
بنشون ءِ رد ءَ 19 مارچ 2024 ءَ شپ ءِ دوازدہ ءَ پاکستانی لشکر ءَ مستونگ چلتن پمپ ءِ نزیک ءَ سدام ھسین نامیں ورنایے آوار جتگ ءُ بیگواہ کرتگ۔ زور بیگواھیں ورنا ءِ بارو ءَ گوشگ بوگ ءَ اِنت کہ مستونگ ءِ ھند کلی آزیز آباد ءِ جاہ منند اِنت۔
