شال: پہ زور بیگواھیں مردمانی پدجنگ ءَ شال پریس کلب ءِ دیم ءَ برجاھیں زھرشانی گدان ءَ 5397 روچ سرجم بوتگ۔ چارشمبے ءِ روچ ءَ پی ٹی ایم ءِ بنجاھی ءُ استانی سروک ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پاکستان میان استمان ءِ کمک ءَ زورگ ءُ ایشاں بلوچ، پشتون ءُ سندیانی چکچینی ءَ کارمرز کنگ ءَ اِنت۔ پاکستان ءِ ناشرکاری ءُ نزوریں راجانی چکچینی ءِ سوب میان استمان ءِ کمک اَنت۔ پاکستان ءِ کمک کنوکیں ڈیھ، اکوام متھدہ ءَ ھوار میان استمانی ادارہ پاکستان ءِ بارو ءَ وتی شونداتانی سر ءَ دلگوش بہ کن اَنت ءُ بلوچ چکچینی ءُ بلوچستان ءَ زوریں دستیگ کنگ ءُ ناشریں کاروائیانی دارگ ءَ وتی پرز ءَ پیلو بہ کن اَنت۔
آئی ءَ گوشتگ کہ پاکستان دراجکشیں وھدے بیت کہ یکشل ءَ بلوچستان ءَ وتی زوراکی برجاہ داشتگ اَنت۔ پہ زوراکیانی بگیری ءَ وی بی ایم پی ءِ روانک ءُ شدکشیں زھرشانی گدان ءِ ھلاس کنگ ءَ ھر وڑیں زوراکی چکاسگ بوتگ اَنت۔
ماما کدیر دیمتر ءَ گوشتگ کہ پاکستانی لشکر ءَ بلوچانی زوریں بیگواھی ءُ شھید کنگ ءِ درچ برجاہ داشتگ ءُ پہ بلوچ چکچینی ءِ تیز کنگ ءَ ھر وڑیں زور چکاسگ ءَ اِنت۔ پروری ءُ مارچ ءِ ماہ ءَ سدانی کچ ءَ بلوچ ورنا زور بیگواہ کنگ بوتگ اَنت کہ آیانی تہ ءَ گیشتر نودربر اَنت۔ مکران، درہ بولان ءَ ھوار جتائیں ھنداں لشکرکشی تیز کنگ بوتگ اَنت۔
آئی ءَ گوشتگ کہ اکوام متھدہ ءَ ھوار جھان ءِ میارباریں بے تواری ءِ سوب ءَ پاکستان ءِ زوراکی تیز کنگ بوتگ اَنت۔ ایشی ءِ سان تیوگیں دمگ ءِ سر ءَ کپگ ءَ اَنت۔ مردمی ھکانی ادارھاں ھوار میان استمان ءِ کانود ءِ بستار ءَ تیوک ءَ آئی نام پشت کپتگ۔ زوراکیانی ھلاس کنوک اکوام متھدہ ءُ میان استمانی مردمی ھکانی ادارہ وتی کرد ءَ پیلو بہ کن اَنت ءُ پاکستان ءَ گِر ءُ دار بہ کن اَنت۔
