بلوچ نودربر گل آزاد ( بی ایس او آزاد ) ءِ بنجاھی جارکش ءَ 27 مارچ بلوچستان ءِ سر ءَ زوریں دستیگ کنگ ءِ روچ ءِ درگت ءَ وتی شنگ کرتگیں یک درشانے ءَ گوشتگ کہ بلوچستان ءِ آجوئی یک گوستانکی راستی یے ایشی جھان ءَ کس رد کرت نہ کنت، بلکیں جھان بلوچستان ءِ سر ءَ پاکستان ءِ درکانودی زورگپتی ءِ بگیری ءَ توار چست بہ کنت ءُ بلوچ راجی زرمبشت ءِ پلہ کنگ لوٹ ایت۔ بلوچستان ءِ سر ءَ مرچی ءَ 76 سال پیش 27 مارچ 1948 ءَ پاکستان ءَ درکانودی دستیگ کرتگ ءُ چہ ھما روچ ءَ داں مرچی پہ زور چکچینی کنگ ءُ ریاست بلوچستان ءِ سر ءَ وتی زورگپتی ءِ برجاہ دارگ لوٹ ایت۔ بلوچستان ءَ برجاھیں مردمی ھکانی لگتمالی ھمے درچ ءِ یک بھرے ھمیشی رد ءَ بلوچ سرڈگار ءِ پہ زور دارگ ءِ جھد کنگ بوگ ءَ اِنت۔ روکپت ءِ ھما کہ راجمستری ءُ آجوئی ءِٹاپار جنوک اَنت آیان ءَ بلوچ راجی زرمبشت ءِ سرجم ءَ پلہ مرزی ءُ کمک کنگ لوٹ ایت۔ بلوچستان ءِ سر ءَ پاکستان ءِ زورگپتی درکانودی، بے دود ءُ میان استمانی راھبندانی بگیری اِنت۔ مرچی ھما وڑ ءَ کہ سرجمیں جھان ءِ ڈیھ تیوک ءَ یورپی توانمند یوکرین ءِ وتی آجوئی ءِ پھریزگ ءِ کمک ءَ کنگ ءَ اَنت، ھمے کمک بلوچ ءِ وڑیں زورگپتیں پہ راجے ءَ کنگ لوٹ ایت، اد ءَ ھم پاکستان ءَ وتی لشکری دیم داتگ اَنت ءُ مردم زوراکیانی آماچ کرتگ اَنت ءُ سدانی کچ ءَ بلوچ شھید کرتگ ءُ دستیگ کرتگ۔
جارکش ءَ دیمتر ءَ گوشتگ کہ پاکستان ءَ برتانیہ ءُ آدگہ زورگپتیں توانمندانی گوستانک دربرگی اِنت ءُ چہ بلوچستان ءَ درکپگ لوٹ ایت، چی ءَ کہ جھان ءِ گوستانک اے گپ ءِ گواہ اَنت کہ کجام ھم زندگیں راج پہ توپک ءِ زور ءَ ایردست کنگ نہ بنت، توانمندیں ریاست وتی مشینری ءِ زور ءَ داں لھتیں وھداں کجام ھم نزوریں راجاں گوں وت داشت کنت، بلے ایردست ءُ زورگپت ءِ سیادی مھکم نہ بیت ءُ اے ھر وڑ ءَ ھلاس بیت۔ بلوچستان ءِ سر ءَ زورگر ءِ زورگری ھر وڑ ءَ یک روچے ھلاس بیت، بلے بلوچستان ءَ ھونریچی کنگ ءُ ریاست ھمے سرپد بیت کہ آ وتی زورگپتی ءَ پہ مدامی برجاہ دار ایت۔ امریکہ، پرانس، جاپان، جرمنی ءُ برتانیہ ءِ وڑیں مزنیں توانمنداں ھم وتی زورگپتی برجاہ داشت نہ کرتگ گڑا پاکستان ءِ وڑیں ریاستے کہ ایشی ھچ وڑیں راج ءُ لیکھی بنیادنیست گڑا کجام وڑ ءَ یک زندگیں راجے پہ مدامی توپک ءِ زور ءِ سر ءَ ایردست کنت۔ پاکستان ءِ راجکار ءُ سرکاراں زانگ لوٹ ایت کہ بلوچستان ءَ اے جنگ بے نپ ءُ بے بنیاد اِنت کجام ھم راج چہ مرگ ءَ ھلاس نہ بیت۔ جھان ءِ گوستانکاں پچار ایت کہ لکانی کچ ءَ مردم کشگ بوتگ اَنت بلے آ چہ آجوئی ءِ وڑیں گرانگدر ءُ راستی ءِ لیکہ ءِ بنیاد ءَ کجام ھم راج چہ مرگ ءِ ترس ءَ پد نہ کنز اتگ اَنت۔ ھزاراں بلوچ کشتگ آیانی ژانگولیں لاش چگل دیگ بوتگ، چہ جنگی بالگرداں جھل ءَ دور دیگ بوتگ اَنت ءُ بے کسیں مانشجاھاں کل کرتگ اَنت بلے چہ بلوچ ءِ دل ءَ آجوئی ءِ جوزگ ءُ گوں راجی زرمبشت ءَ مھر کم نہ بوتگ، بلکیں ھمک روچ ءَ گوں ترندی ءَ وتی آجوئی جھد برجاہ داشتگ ءُ اے جھد ءِ آسر نہ تیوک ءَ بلوچستان ءِ آجوئی بندوک اِنت، زورگریں پاکستانی ریاست بلوچستان ءَ یک بے مولیں جنگے مڑگ ءَ اِنت ایشی آسر ءَ بلوچستان ءِ آجوئی ھمگرنچ اِنت۔ جھان ءَ وتی چمانی بند کنگ ءُ بلوچستان ءِ جھد مان نیارگ ءُ پاکستان ءَ سلاہ بند کنگ ءِ جاہ ءَ بلوچستان ءِ آجوئی منّگ لوٹ ایت، چوش کہ اے دمگ ءِ تہ ءَ پہ مردمگری ءَ ھژدری اِنت۔
جارکش ءَ گڈی ءَ گوں بلوچ ورنایا دلگوش گور کرتگ ءُ گوشتگ کہ بلوچ ورنایا گوشگ لوٹ ایں کہ بلوچستان ءِ آجوئی چہ پاکستان ءِ جوڑ بوگ ءَ ھزاراں سال پیش یک راستے کہ ایشی سر ءَ پاکستان ءَ پہ زور وتی زوگپتی داشتگ۔ اے وھد ءَ سکا ھژدری اِنت کہ بلوچ ورنا وتی ایردستی ءَ بہ مار اَنت ءُ پہ بلوچستان ءِ آجوئیں ریاستے ءِ گرگ ءَ برجاھیں زرمبشت ءِ بھر بہ بنت دانکہ بلوچ راج یک زندگیں راجے ءِ بستار ءَ بلوچ ءُ پہ اے دمگ ءِ مردمگری ءِ گھتری ءَ کار بہ کن اَنت۔ بلوچستان ءِ سر ءَ پاکستان ءِ زورگپتی ءُ وتگڑ ءُ درکانودی اِنت۔ ایشی ھچ وڑیں کانودی بنیاد، لیکہ ءُ مارشت نیست، بلکیں یک زور ءِ سیادی یے ایشی ھلاسی ھژدری اِنت۔ بلکیں جھان ءُ تیوک ءَ روکپتی توانمند بلوچ راج ءِ اے آجوئی ءِ بستار ءَ بہ منّ ایت ءُ پاکستان ءَ سلاہ بند کنگ ءَ ابید بلوچستان ءِ آجوئی ءِ پلہ مرزی کنگ لوٹ ایت۔
