ایمسٹرڈیم : 27 مارچ ءَ بلوچستان ءِ سر ءَ زورگری ءِ بگیری ءَ سیاھیں روچ ءِ درگت ءَ بلوچ راجی زْرمبشت ( بی این ایم ) ءَ نیدرلینڈز ءِ شھر ایمسٹرڈیم ءَ زھرشانی کرتگ ءُ ریلی کش اتگ۔
زھرشانی کنوکاں جرنبشت ءُ کاگد گون بیتگ۔کاگدانی سر ءَ اوگام نبشتگ اَت ، اوگامانی تہ ءَ آجوئی ءِ پلہ مرزی کنگ ءُ زورگری ایر جنگ بیتگ اَت۔آیاں بلوچستان ءِ جاور ءِ سر ءَ ھندی مردمانی سرپدی ءَ پنتاک ھم شنگ کرتگ۔
گوں زھرشانی کنوکاں گپ جنان آیاں ڈاکٹر اللہ نذر ءِ اے گپانی درور داتگ ءُ پہ زْرمبشت ءَ وتی ھمگرنچی ءِ مسام درشانتگ کہ بلوچ ءِ آجوئی ءِ جھد داں مزدانک ءَ برجاہ مان ایت۔ آیاں گْوشتگ 27 مارچ 1948 بلوچ گْوستانک ءِ دردناکیں روچے ، زوراکی ءِ بگیری ءَ بلوچ ءِ گھگیری ءَ 75 سال سرجم بیتگ۔
آیاں 27 مارچ 1948 بلوچ گْوستانک ءِ سیاہ ترین روچ ءِ رنگ ءَ درشان کرتگ ، آئی ءَ پاکستان ءِ ناراھیں زورگری ءِ بگیری ءَ پاداریں جھد ءِ درور دیان ءَ گْوشتگ ، بلوچستان ءَ برجاھیں مردمی اگبالانی بگیریانی دارگ ءَ میان استمانی یکجھتی لوٹ ایت۔
آیاں دلگوش پرینتگ کہ پاکستان بلوچستان ءِ مڈیاں لٹ ءُ پل کنگ ءُ گزرانکی تک ءَ بلوچاں تاوانبار کنگ ءَ اِنت۔
آیاں وتی ھم پتیں دیدانک ءِ رد ءَ چہ راجانی سنت ، یورپی سنت ءُ دگہ میان استمانی تْرامگیجاں لوٹ کرتگ کہ آ دزمانجنی بہ کن اَنت ءُ بلوچستان ءَ مردمی اگبالانی جاورانی چار ءُ ٹپاس ءَ بہ کن اَنت۔ میان استمان پہ آجوئی ءُ مزدانک ءِ جھد ءَ بلوچانی ھمدست بہ بیت۔
