بلوچ آجوئی لشکر ( بی ایل اے ) ءِ جارکش جیھند ءَ ماں رسانکدر ءَ وتی شنگ کرتگیں درشانے ءَ گوشتگ کہ پنجگور ءُ کلات ءَ بی ایل اے ءِ سرمچارانی پاکستانی لشکر ءِ سر ءَ ارش ءُ میڑ اں دژمنیں لشکر ءِ ھپت کارمند مرتگ ءُ نہ ترسیں ھمبل سرمچار چاکر پنام تابش شھید بوتگ۔
آئی ءَ گوشتگ کہ بی ایل اے ءِ سرمچاراں 20 مارچ ءِ شپ ءَ کلات ءِ ھند جوھان ءَ زورگریں پاکستانی لشکر ءِ بنجل ءِ پھازداریں پانگس ءِ سر ءَ راکٹ آس داتگ ءُ گوں وتکاریں سلاھاں ارش کرتگ۔ ارش ءِ آسر ءَ کم چہ کم دو دژمنیں کارمند جاھی مرتگ ءُ باز ٹپی بوتگ۔
جارکش ءَ گوشتگ کہ بی ایل اے ءِ سرمچاراں دگہ یک کاروائی یے ءَ پنجگور ءِ رکشاں کور ءَ برجاھیں پاکستانی لشکر ءِ پانگس ءِ سر ءَ گوں راکٹ ءُ مزنیں سلاھاں ارش کرتگ، پانگس ءَ ساڑی ئیں دو کارمند جاھی مرتگ ءُ دژمن ءَ گیش جانی ءُ مالی تاوان بوتگ۔
آئی ءَ گوشتگ کہ بی ایل اے ءِ ھمبل شھید چاکر پنام تابش ء لیاکت جاہ منند پنجگور ھدابان 20 مارچ ءِ شپ ءَگچک کھن ءَ زورگریں پاکستانی لشکر ءِ گون ءَ یک ٹوھیں میڑے ءَ شھید بوتگ۔
جارکش ءَ گوشتگ کہ شھید چاکر چار سال اِنت کہ بی ایل اے ءَ ھوار اِنت، آ شھری جنگ ءَ زورگریں لشکر ءِ تاوان دیگ ءَ پد گل ءِ سوڑگ ءِ رد ءَ کوہ ءَ آتکگ۔ شھید چاکر پنام تابش پنجگور شھر ءَ ھوار کیلکور، گچک، آواران ءِ ھند مشکے، واشک ءِ ھند راگے ءَ چنچو جنگاں دژمنیں لشکر تاوا ن داتگ۔ آ چہ وتی کارشونی ءُ جپاکشی ءِ سوب ءَ کیلکور ءَ جنگ ءِ کمک کمان ءِ زمہ واریاں پیلو کنگ ءَ بوتگ۔
آئی ءَ گوشتگ کہ بیست مارچ ءَ ھمبل چاکر پنام تابش آدگہ ھمبلانی ھمراھی ءَ یک کاروائی یے ءِ درچ ءَ سپرے ءَ بوتگ اَنت کہ آ گوں دژمنیں لشکر ءَ دیم پہ دیم بوتگ اَنت، اود ءَ بی ایل اے ءِ سرمچار ءُ دژمنیں لشکر ءِ میان ءَ میڑے برجاہ بوتگ۔ یک ادارے ءِ برجاھیں میڑ ءَ دژمن ءِ سے کارمند جاھی مرتگ ءُ باز ٹپی بوتگ، ھمے میان ءَ ھمبل چاکر سکا ٹپی بوتگ۔ شھید چاکر گوں ٹپی ئیں جاوراں ھمبلیں سرمچاران ءَ مھکمیں راھے پیش داشتگ ءُ دژمن ءِ دیم داشتگ ءُ رند ءَ گڈی تیر ءِ راہ گچین کرتگ ءُ وتی تیر ءَ شھید بوتگ۔
بی ایل اے ءِ جارکش جیھند ءَ گوشتگ کہ بی ایل اے شھید ھمبل چاکر ءَ اے گرانبھائیں دیمونی ءَ ستک شانی ندر کنت ءُ ھمے کول ءَ کنت کہ زوت یا دیر ءَ شھید ءِ اے مول ءَ آئی گڈی منزل ءَ سر کنت۔
