گوادر: شھید پدائیانی کھولاں گھگیری ءَ پد شھیدانی لاش دزگپتگ ءُ رھادگ بوتگ اَنت۔
بنشون ءِ رد ءَ شھید پدائی شوکت ھکیم گنگو ءِ لاش انگت ءَ گوادر ءَ درسرکاری نادراھجاہ ءَ ایر اِنت ۔ شھیدانی لاش کھولاں دزگپتگ اِنت ءُ چہ گوادر شھرءَ درکپتگ اَنت۔
ھندی بنشون ءِ رد ءَ شھید پدائی مسلم ءِمولابکش، مروان ء نواز ءُ ریاز ء الاھی بکش ءِ جنازہ ءِ نماز باند ءَ سھب ءِ دہ ءَ میناز بلیدہ ءَ وانگ ءُ گلزمین ءِ میار کنگ بنت۔
شھیدانی لاشانی نہ دیگ ءَ سول سوسائٹی ءِ سروک گلزار دوست ءِ جار ءِ پد ءَ گوادر مردم مچ بوتگ اَنت ءُ کھولاں شھیدانی لاش پہ زور زرتگ ءُ گاڑیاں مان کرتگ اَنت۔ پاکستانی لشکر ءَ پہ لاشانی نہ دیگ ءَ نادراھجاہ ءِ دروازگ بند کرتگ، کھول چہ گھگیری کنگ ءَ پد لاشانی برگ ءَ سوبین بوتگ اَنت۔
