شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5388 روچ سرجم بوتگ۔ سے شمبے ءِ روچ ءَ بی ایس او پجار ءِ بنجاھی سرکماش بوھیر سالھ، کمک سرکماش ڈاکٹر پاروک، وسیم، امجد، گھرام اسلم، شاکر،مھیم اتا ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ پہ میان استمانی جاورانی مٹیاں میان استمان ءِ توانمندانی نپ ھم مٹ بوگ ءَ اَنت۔ ھمے پارست ءَ پاکستان وتی شونداتاں مٹ کنگ ءُ بلوچ چکچینی ءَ تیز کنگ ءَ اِنت۔
آئی ءَ گوشتگ کہ پاکستان بلوچ چکچینی ءَ میان استمان ءِ کمک ءُ میان استمانی ادارھانی بے تواری ءَ نپ چست کنگ ءَ اِنت۔ انگت ءَ ھمے جھد ءِ برجاہ داشتگ۔ بلوچ زرمبشت ءِ بگیری ءَ کشگ ءُ دور دیگ ءِ شوندات ءَ کار گرگ ءَ اِنت۔
ماما کدیر گوشتگ کہ پاکستانی لشکر ءُ چیریں ادارھاں لھتیں سالانی میان ءَ ھزارانی کچ ءَ بلوچ پسگ آوار جتگ ءُ شھید کرتگ اَنت آیانی ژانگولیں لاش چگل داتگ اَنت۔ میان استمانی ادارہ ءُ مردمی ھکانی ادارھانی نیمگ ءَ انگت ءَ ھچ وڑیں دلجمیں گامگیج زورگ نہ بوتگ۔
آئی ءَ گوشتگ کہ پاکستان ءَ بلوچستان ءِ کنڈ کنڈ ءَ وتی ناشرکاری برجاہ داشتگ اَنت ءُ ھمک روچ بلوچ آبادیانی سر ءَ اُرش کنگ ءِ درچ اوشتگ ءِ نام ءَ نہ زانت۔
