شال: سرگودھا زانشتجاہ ءِ نودربر زور بیگواھیں ھدا داد سراج ءِ کھول ءَ شال پریس کلب ءَ پریس کانپریس کرتگ ءُ گوشتگ کہ ھدا داد سراج 8 مارچ 2024 ءَ شپ ءِ ھشت ءُ نیم ءَ ھمبلانی ھمراھی ءَ پہ نان ءِ گرگ ءَ شتگ ءُ واتری ءَ بھادر شاہ زپر دگ ءَ الرشید نادراھجاہ ءِ دیم ءَ پجارنہ بوتگیں مردمے ءَ جستءُ پرس ءِنیمونءَ داشتگءُ ھمے وھد ءَ گاڑی ءِ سر ءَ دگہ لھتیں مردم آتکگ اَنت ءُ پہ زور آوار جتگ ءُ گوت برتگ۔ یات بہ بہ اِت کہ ھما مردم ءَ پہ جست ءُ پرس ءَ داشتگ آ ھمے گاڑی ءَ سوار بوتگ ءُ شتگ۔
آئی ءَگوشتگ کہ ما وتی نودربراں چہ ھزار کلو میٹر دور پہ وانگ ءَ دیم دے ایں دانکہ آ شریں زانتے دربر اَنت، بلے اود ءَ زور بیگواھی ءِ نشانگ کنگ بنت۔ آچہ وانگ ءِ دربرگ ءَ ترس آماچ بنت ءُ یک ترس ءِ چاگردے ودی بیت چہ ایشی مات ءُ پت وتی زھگاں پہ وانگ ءَ دیم دیگ ءَ ترس اَنت۔
آئی ءَ گوشتگ کہ بلوچ نودربرانی زوریں بیگواھی ءِ درچ بلوچستان ءِ جتائیں ھنداں برجاہ اِنت نوں چہ بلوچستان ءَ درکپتگ ءُ پنجاپ ءِ جتائیں شھر ءُ وانگجاہ ءِ سر ءَ زرتگ اَنت۔
آئی ءَ گوشتگ کہ ھدا داد سراج ء سراج اھمد ءِ زوریں بیگواھی ء ِ بگیری ءَ بلوچ اسٹودنٹس کونسل سرگودھا پریس کلب ءَ پہ پریس کانپریس ءَ شتگ اَنت گڑا پنجاپ پولیس آیانی دیم ءَ اڑاند ودی کنت۔
آئی ءِ گوشتگ کہ پہ ھدا داد ءِ زوریں بیگواھی ءُ بلوچ نودربرانی نشانگ کنگ ءُ ترسینگ ءِ بگیری ءَ بلوچ اسٹوڈنٹس کونسل پنجاپ ءِ نیمگ ءَ سرگودھازانشتجاہ ءَ زھرشانی کنگ بیت اودءَ آیانی ترسینگ ءِ جھد ءَ کن اَنت۔
آئی ءَ گوشتگ کہ 14 مارچ 2024 ءَ کرکی تجابان ءَسی پیک دگ پہ ھدا داد ءِ آجوئی ءَ بند کنگ بوتگ۔ گڈی ءَ واکدار ءَ کول کرتگ ءُ ھدا دا د ءِ آجوئی ءِ دلجمی داتگ15 مارچ ءَ دمگدار ءِ گند ءُ نند کنگ ءَ پد ھدا داد سراج ءِ پہ آجوئی ءَ داتگیں وھد ءَ کول پیلو نہ کرتگ۔
آئی گو شتگ کہ پہ ھدا داد ءِ زوریں بیگواھی ءَ ھمک درٹک اتگ ءُ ھرپیمیں جھد کرتگ انگت ءَ دگہ ھچ وڑیں دلجمیں پسو نہ رستگ۔
آئی ءَ گوشتگ کہ مرچی کرکی تجابان ءَ تربت شال شھدگ ءَ زھرشانی دوبر بندات کنگ بوتگ، مئے لوٹ ھمیش اِنت کہ ھدا داد سراج ءِ آجوئی ءِ بارو ءَ دلجمی دیگ بہ بیت، ما گوں درساں کمک کنگ ءِ لوٹ ءَ کن ایں ۔
