بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں آواران ءِ ھند جاو ءَ زورگریں پاکستانی لشکر ءِ پانگس ءِ سر ءَ اُرش کُرتگ یک کارمندے کُشتگ ءُ یکے ٹپی کُرتگ۔
آئی ءَ گوشتگ کہ بی ایل ایپ ءِ سرمچاراں 17 مارچ ءَ یکشمبے ءِ بیگاہ ءِ ھپت ءَ جاؤ ءِ کوٹو دمب ءَ برجاھیں دژمنیں لشکر ءِ پانگس ءِ سر ءَ گوں ٹوھین ءُ وتکاریں سلاھاں اُرش کُرتگ۔ اُرش ءَ دژمنیں لشکر ءِ یک کارمندے جاھی مُرتگ ءُ یکے سک ٹپی بوتگ۔
جارکش ءَ گوشتگ کہ اُرش ھما وھد ءَ کنگ بوتگ وھدے کہ زورگریں دژمن بازیں کچے ءَ پانگس ءَ ساڑی بوتگ، اُرش ءَ دژمن ءِ گاڑی ءُ پانگس ءَ ھم تاوان بوتگ۔
بی ایل ایپ ءِ جارکش میجر گھرام ءَ ارش ءِ زمہ واری من اتگ ءُ گوشتگ کہ داں سرڈگار ءِ آجوئی ءَ دژمن ءِ سر ءَ ارش برجاہ بنت۔
