بلوچ نودربر گل آزاد ( بی ایس او آزاد ) ءِجارکش ءَ ماں رسانکدر ءَ وتی شنگ کرتگیں درشانے ءَ گوشتگ کہ گل ءِ بنجاھی سرکماش چیئرمین زاھدءُ کستریں کمک سرکماش اسد ءِ زوریں بیگواھی ءَ دہ سال سرجم بوتگ بلے میان استمانی ادارہ سرجم ءَ بے توار اَنت۔ ھما ادارھاں پہ زاھد ءِ آجوئی ءَ دلجمی داتگ اَت ھما ھم سرجم ءَ بے توار اَنت کہ اے پہ آیاں جستے۔ زاھد ءُ اسد شال ءَ پیشیگیں سرکماش بانک کریمہ ءُ آدگہ ھمبلانی دیم ءَ آوار جنگ ءُ بیگواہ کنگ بوتگ اَنت ایشی گواھی بانک کریمہ بازیں جاھاں داتگ۔ ریاست ءَ زاھد ءُ اسد ءَ زندان ءَ بندیگ کرتگ ءُ بلوچ ورنایانی تہ ءَ آیانی لیکہ ءَ ھلاس کرتگ نہ کنت۔ پہ ورنا ءُ جھدکاراں مرچی ھم آ بامرد زانگ بنت۔ سیاسی سروکانی اے وڑیں زوریں بیگواھی ءُ نہ منگ بے سوبیں ریاست ءِ تچکیں پروش ءِ نشانی اِنت۔
آئی گوشتگ کہ زاھد ءِ گوستگیں دہ سالاں زنداناں بندیگ کنگ ھمے گپ ءِ گواھی ءَ دنت کہ زورگریں پاکستان بلوچستان ءَ چہ سیاسی جھد ءَ سرجم ءَ ترس آماچ اِنت۔ سیاسی جھدکارانی نشانگ کنگ ءُ آیانی درمردمی زنداناں بندیگ کنگ ریاست ءِ ترس آماچی ءِ نشانی اِنت۔ چیئرمین زاھد ءُ اسد ءَ ھوار گل ءِ سدانی کچ ءَ ھمبل زور بیگواہ کنگ بوتگ۔ اے وھد ءَ گل ءِسرکماش ءَ ھوار رسانکدری کارگشاد شبیر، کمک سرکماش زاکر ءُسدانی کچ ءَ ھمبل زور بیگواہ اِنت ءُ گل ءِ باز باسک ءِ لاش چگل دیگ بوتگ اَنت۔ پہ بلوچ سیاسی کارکنان انچیں جاور ودی کنگ بوتگ اَنت کہ چہ زندان ءَ کم نہ اِنت ءُ سرجمیں بلوچستان چہ لشکری ءَ پر کنگ بوتگ، بزانکہ وانگجاھانی تہ ءَ لشکری نادینگ بوتگ اَنت۔ زاھد ءُ اسد ءَ ھوار آدگہ سیاسی جھدکارانی پہ آجوئی ءَ دلجمی دیگ مردمی ھکانی ادرھانی زمہ واری بیت۔ چیئرمین زاھد ءَ بلوچ بیگ ءُ پہ وتی مردماں سیاسی جھد کنگ ءِ میار ءَ زورگریں لشکر ءَ چنچو سال اِنت کہ بیگواہ کرتگ۔ پہ زاھد ءِ آجوئی ءَ گل ءِ نیمگ ءَ کراچی پریس کلب ءِ دیم ءَ داں 26 روچاں مرگ شدکشیں ھرتال کنگ بوتگ، میان استمانی ادارھاں آئی کیس ءِ یاداشت کنگ ءِ ھواری ءَ بلوچستان ءُتیوگیں جھان ءَ زاھد، اسد ءُ پہ آدگہ زور بیگواھیں مردمانی آجوئی ءَ زھرشانی کنگ بوتگ۔ بلے زورگریں ریاستی ادارھاں داں انوں ھمے کار برجاہ داشتگ۔
جارکش ءَ گڈی ءَگوشتگ کہ گوں درسیں مردم دوستیں ادارھاں لوٹ کن ایں کہ آ پہ زاھد ءُ اسد ءِ آجوئی ءَ گوں گل ءَ کرتگیں کول ءِ رد ءَ ریاست ءَ زور بہ دے اِنت ءُ پہ آیانی آجوئی ءَ وتی کرد ءَ پیلو بہ کن اَنت۔ چاگردی رسانکدر ءَ #SaveZahidAndAsadBaloch ھیش ٹیگ ءَ کمپینے برجاہ دار ایں گوں درسیں مردماں بھر زورگ ءِ لوٹ ءَ کن ایں۔
