بلوچ اسٹوڈنٹس ایکشن کمیٹی کراچی ھنکین ءِ دیوان ھنکین ءِ کارمستر زکریہ ءِ سروکی ءَ برجم دارگ بوتگ۔ دیوان ءِ گچینی مھمان بنجاھی رسانکدری کارگشاد اُزیر بوتگ۔ دیوان ءِ بن گپ بنجاھی سرکیولر، ھنکین ءِ اھوال، نگد کاری، گَلءِ کار، ھندی ءُ میان استمانی سیاسی جاور ءُ آؤکیں گامگیج بعتگ اَنت۔
دیوان ءَ بنجاھی سنگت ءَ بنجاھی سرکیولر ونتگ کہ آئی ءِ تہ ءَ گل ءِ بنجاھی پتر ءِ دیوان ءِ ھال ءُ گل ءِ کار ءُ پہ دیمی کاراں زرتگیں سوڑگ دیوان ءِ دیم ءَ ایر کنگ بوتگ اَنت۔ بنجاھی کار ءُ پالیسیانی سرءَ دلجمی ءَ گوں تران ءَ پد دیم ءِ بن گپ ھنکین ءِ ھال بوتگ کہ آئی ءِ تہ ءَ کراچی ھنکین ءِ گوستگیں کارانی سرجمیں ھال دیوان ءِ دیم ءَ ایر کنگ بوتگ اَنت ءُ دیمی بن گپ نگد کاری ءَ کارانی گھتر کنگ، ھنکین ءِ نزوریانی سرءَ نگد کنگ بوت ءُ ھنکین ءِ زمہ واراں وتی نزوری من اتگ اَنت ءُ اھد کرتگ کہ آوکیں زمہ وار اِش ردیاں گِر اَنت ءُ ادارہ ءَ گیش مھکم کنگ ءَ وتی جھد ءَ تُرند کن اَنت۔
گل ءِ کار ءِ بن گپ ءَ بنجاھی سنگت ءَ تران کنان ءَ گوْشتگ کہ مرچی ادارہ بلاھیں پندے ءِ بُرگ ءَ پد ھما جاہ ءَ اِنت ءُ یک مھکمیں سیاستے ءَ گوں دیم ءَ جُنزگ اِنت۔ بلے ھنکین ءِ تہ ءَ لھتے بے سریں گال بند کارمرز بیگ ءِ رواج گندگ بیگ اِنت، اے ردیں تب جوڈ کنگ ءَ اَنت پہ درور نیوٹرل مردم ءُ در سیاسی مردم، سافٹ ءُ ریڈیکل سیاست ءُ ایدگہ، اِش کُل بے سریں گالبند اَنت ءُ بے سمائی ءَ مئے زھنانی تہ ءَ اشاں جاہ کتگ، کسے اگاں وت ہمت ءُ جہد کت نہ کنت گڈا لبز نیوٹرل ءُ در سیاسی آں کارمرز کنت ءُ وتءَ بے میار کنگ ءِ کوشست کنت بلے بلوچستان ءَ سیادی داروکیں ورنائے بیھ ھم در سیاسی بیت نہ کنت، اگاں کسے وت ءَ نیوٹرل گوْش ایت گڑا آ پاد پِر دنت ءُ وتی نزوری ءُ کار نہ کنگ ءِ نیموں پیداگ کنگ اِنت۔ دومی نیمگ ءَ ما گوْش ایں کہ مارا جنینانی سرءَ کار کنگی اِنت، اے گپ رد اِنت، جنین زاناں بلوچ چاگرد ءَ چہ دریں مردم اَنت کہ آھانی سر ءُ جتا کار کنگ ءِ گپ بہ بیت! جنین ھم یکیں ھساب ءَ بلوچ چاگرد ءِ بھر اَنت۔ جنینانی سر ءَ کار کنگ ردیں گپے بلکیں جنین ءَ گوں ھواری ءَ کار کنگ ءِ گپ بہ بیت۔ ادارہ ءِ دستور ءُ لوگو ءِ تہ ءَ تچک اِنت کہ کتاب ءَ داروکیں یک دستے جنین ءِ گڑا دومی مردین ئیگ اِنت پمیشکا ادارہ ءَ اے پرْک ءُ پیر ھلاس کتگ گڑا باسکاں ھم ھمے پرک ءُ پیر وتی بے سمائی ءِ تہ ءَ کشگی اِنت۔
سنگت ءَ دیمتر ءَ تران کنان ءَ گوْشتگ کہ ادارہ ءِ تہ ءَ ما ڈسپلین ءِ گپ ءَ کن ایں کہ نیست اِنت، ڈسپلین ھست بس پجاہ آرگ، زیرگ ءُ کار کنگی اِنت۔ اے ڈسپلین اِنت کہ سنگت اے دیوان ءَ نشتگ ءُ گوش دارگ ءَ اَنت یا ایدگہ گل ءِ کار بنت کہ گوں پابندی ءَ سنگت کن اَنت اِش، پمیشکا ڈسپلین ھست اِنت بلے سنگت پجاہ آرگ ءَ نزوری کن اَنت پمیشکا ڈسپلین نزور بیت۔ ادارہ ءِ مھکم کنگ ءَ وتی تہ ءَ ادارھی سِنچ ودی کنگ ءُ گل توک ءَ چیں مھکم کنگی اِنت گڑا ڈن ءَ لس نودربریے ءِ رھشونی بیت کنت۔ ھمنچو ادارہ توک ءَ چیں مُھر ءُ مھکم بیت ھمنچو ڈنی نودربرانی چاگرد سیاسی بیت کنت۔
دیوان ءَ سرجمیں بنگپانی سرءَ تران کنان ءَ پد دیم ءِ بن گپ ھندی ءُ میان استمانی سیاسی جاور بوتگ اَنت کہ سنگتاں جاورانی سر ءَ وتی چمشانک ایر کرتگ اَنت ءُ گڈی بن گپ آوکیں گامگیج بوتگ کہ آئی ءِ تہ ءَ پیسری ھنکین ءِ کابینہ ھلاس کنگ بوتگ ءُ نوکیں کابینہ گچین کنگ بوتگ۔ نوکیں کابینہءِ تہ ءَ زکریہ کارمستر، موسا کمک کارمستر، زیشان کارگشاد، نواز کمک کارگشاد ءُ ھمل رسانکدری کارگشاد گچین کنگ بوت اَنت۔
دیوان ءِ گُڈی ءَ نوک گچین بوتگیں سنگت سوگند دیگ بوتگ اَنت ءُ دیوان ھلاس کنگ بوتگ۔
