چہ بلوچ راجی زْرمبشت ( بی این ایم ) ءِ نیمگ ءَ ماں جنیوا ءِ اھوالکاری گس ءَ گوں اھوالکاراں نیادے ایر کنگ بیتگ۔گوں اھوالکار ءُ میان استمان ءَ تْران کنان ءَ بی این ایم ءِ سرکماش ڈاکٹر نسیم ءَ بلوچ راج ءِ جیڑھانی سر ءَ گپ جتگ ءُ ماں بلوچستان ءَ میان استمانی دزمانجنی ءِ لوٹ کرتگ۔
ڈاکٹر نسیم ءَ چہ راجانی سنت ءُ شاھگانیں میان استمان ءَ دزبندی کرتگ کہ آ بلوچ زْرمبشت ءِ پلہ مرزی بہ کن اَنت۔ آئی ءَ گوں بلوچ راج ءَ برجاھیں تْرام اتگیں ناروائی ءُ مردمی اگبالانی لگتمالیانی آسر کنگ ءِ لوٹ کرتگ ءُ اے گپ ءِ سر ءَ زور داتگ کہ آجوئی ءُ مزدانک ءِ لوٹانی اش کنگ ءُ ایشانی سر ءَ میان راجی تک ءَ گامگیج زیرگ ءَ جھان ءِ دلگوش ارزشت دار ایت۔
ڈاکٹر نسیم ءَ دودمانی مڈی ءِ بستار ءَ بلوچ راج ءِ گھگیری ءُ پہ وتواجھی ءَ دیریگیں جھد ءِ بارہ ءَ گپ جتگ ، بلوچ راج سداں سال کْوھنیں راجے ، آئی ءَ برتانیا ءِ نوک آبادی ءِ زمانگ ءَ دری زورگری ءُ گْوستانکی مٹیانی میان ءَ گوں گھگیری ءَ وتی جتائیں پجار ، زبان ءُ دودمان برجاہ داشتگ اَنت۔
سرکماش ءَ گْوستانکی پژدر ءَ گْوشتگ، سال 1947 ءَ بلوچستان ءَ وتی آجوئی ءِ جار جت بلے سال 1948 ءَ پاکستان ءَ آئی ءِ سر ءَ بیڑ برت ءُ بلوچستان زور گپت، اے ناراھیں زورگری ءِ بگیری ءَ بلوچ راج ءَ یکشل ءَ گھگیری کرتگ۔
آئی ءَ چہ پاکستانی مھترھند ءِ تْرامگیجانی دست ءَ زور بیگواھی، درآمیدگسی کوش ، آزار دئی ءُ ناراھیں دزگیریانی پجیگ ءَ بلوچ راج ءِ سر ءَ بیوکیں مردمی اگبالانی بگیریانی نیمگ ءَ دلگوش پرینتگ کہ آیانی پد ءَ بلوچ گلزمین ءِ چاگرد ءَ ترس ءُ زوراکی برجاہ اَنت۔
ڈاکٹر نسیم ءَ بلوچ راج ءِ بدیں جاور ءِ سر ءَ تْران کنان بلوچستان ءَ زوربیگواھی ءُ یکگوریں مانشانی دست کپگ ءِ سر ءَ بے تاھیری درشان کرتگ۔ آئی ءَ ناشرکاری ءِ گر ءُ داری تک ( سی ٹی ڈی ) ءِ دروگیں میڑاں ھوار بیگ ایر جتگ، کہ آئی ءَ بلوچ شھرمنندانی سر ءَ ناروائی ءُ آزار دئی ءِ دْرچ برجاہ داشتگ۔
چیئرمین ءَ ماں بلوچستان ءَ رسانکی کوراسی ءِ نیمگ ءَ ھم دلگوش پرینتگ۔ آئی ءَ نشان داتگ کہ بلوچستان سرجم ءَ پاکستانی لشکر ءِ دست ءَ اِنت ءُ آ اود ءَ آجوئیں رسانک گْواہ نہ دنت۔ پاکستانی لشکر اھوالکاراں گوں زمینی راستیاں ھمدپیں ھالانی شکسایگ ءَ دار ایت۔
ڈاکٹر نسیم ءِ رد ءَ بلوچستان ءِ مردمانی چہ ناپتیں رسانک ءَ زبھری ءِ آسر کنگ ءُ مردمی اگبالانی لگتمالیانی گر ءُ دار ءَ میان استمانی دزمانجنی المی اِنت۔
سرکماش ءَ پریس کانپرنس ءِ گڈ سر ءَ پاکستان ءِ بگیر ءُ بلوچستان ءِ پلہ مرزی ءَ ھم پتیں گامگیج ءِ دزبندی کرتگ، آئی ءَ اے اوست درشانتگ کہ آئی ءِ اے دزبندی چہ ھمک ھلک ءُ ھنداں ابید چہ سیمسری گر ءُ بنداں گوش دارگ بیت ءُ ایشی ءِ مردمی بنیاد ءَ مزدگریں پسویے کئیت۔
اے اھوالکاری نیاد بی این ایم ءِ ماں جنیوا ءَ میان استمانی اگبالانی پتر ءِ 55می نیاد ءِ میان ءَ بلوچستان ءِ جیڑہ ءِ سر ءَ میان استمانی دلگوش ءِ پرینگ ءِ سئے روچی باوست ءِ بھر اَت۔
11 مارچ ، 2024 ءِ بیگاہ ءَ اے باوست ءِ بندات چہ بی این ایم ءِ ماں جنیوا پریس کلب ءَ بلوچستان ءِ سر ءَ چارمی میان استمانی کانپرنس ءَ بیتگ ، کہ آئی ءِ تہ ءَ نامی ئیں مردماں بلوچستان ءِ سر ءَ وتی سسا درانگاز اتگ اَنت ءُ گوں بلوچ راج ءَ وتی ھمدردی ءُ پلہ مرزی ءِ درشان کرتگ۔
اے باوست دیم ءِ پدانک ءَ گوں دگرگونیں مراگشاں آیوکیں دو روچاں راجانی سنت ءِ کارگس ءِ دیم ءَ ماں ’بروکن چیئر‘ ءَ برجاہ بیت۔
