![](https://zrumbesh.com/wp-content/uploads/2024/03/WhatsApp-Image-2024-03-10-at-08.01.07_da528867.jpg)
گوادر: بلوچ یکجھتی کمیٹی ءِ نیمگ ءَ برجاھیں سرپدی مراگش ءَ بی وائی سی ءِ سروک ڈاکٹر ماہ رنگ ءَ تران کرتگ ءُ گوشتگ کہ ھما مردم زندگ گوشگ بیت آئی زرد زندگ اِنت آ وتی کر ءُ کش ءِ مردمانی بزگی ءَ چار ایت ءُ وت ءَ راجدوستے کنت ءُ پہ اے بزگی ءِ ھلاس کنگ ءَ وتی جند ءَ ھلاس کنت۔ اے گوادر شھیدانی جاہ اِنت آیاں پہ بلوچ سرڈگار ءِ رکینگ ءَ وتی جان ندر کرتگ اَنت۔ ما وھدے اد ءَ ساہ کش ایں وتی ھما شھیدانی ساہ کشگ ءَ مار ایں ءُ ھمے گمان کن ایں کہ ما وتی شھیدانی سرڈگار ءِ سر ءَ اوشتاتگ ایں۔
آئی ءَ گوشتگ کہ زی ھمے ایردستیں راج ءِ زورگریں ریاست ءِ جوڑ کرتگیں دگ ءَ شش ورنا بیران بیت، ھما ورنا بلوچ ءِ باندات ءُ سیاسی جھدکار بوتگ اَنت، آ ھمے دگ ءِ سوب ءَ بیران بنت۔ مارا ءُ شمارا زانگی اِنت کہ ایردستیں راج ءِ ریاست مارا تیوک ءَ گوں توپک ءَ نہ کش ایت بلکیں پہ مئے کشگ ءَ وڑ وڑیں پندل ساز ایت۔ مرچی ما وتی ھما مردمانی درداں ھواریں کہ دگ ویل ءَشھید بوتگ اَنت۔ اے دگ ھم ھمے وڑ ءَ جوڑ کنگ بوتگ اَنت کہ بلوچ ءِ گیشترچکچینی بہ بیت۔
ڈاکٹر ماہ رنگ ءَ گوشتگ کہ گوستگیں دہ روچ بیت ما بلوچ یکجھتی کمیٹی ءِ ٹولی ھمدءَ گوادر ءَ ایں بلے من ءَ گمان نہ بیت کہ من اولی رند ءَ گوادر ءَ آتکگاں، گوادر مدام مئے سیاسی دیوانانی بھر بوتگ۔ گوادر ءِ تہ ءَ ھرچی کہ کار بوتگ اَنت آ مئے دیم ءَ بوتگ اَنت، گوادر تھنا نہ بوتگ سرجمیں بلوچستان ءَ آیانی گم پر بوتگ۔ بلوچانی گوادر ءِ تہ ءَ دگہ ھچ پرک نیست بلوچ ءِ ھما بزگی ءُ نا دزرسی اِنت۔ بلوچ یکجھتی کمیٹی ءَ دگہ کمک نہ کرتگ بس شمئے ھمراھداری کرتگ۔ ما اد ءَ آتکگیں گوں شما توار چست کنگ لوٹ ایں، شمئے توارءَ داں راج ءَ سر کنگ لوٹ ایں۔ ما شمارا دلبڈی دیگ لوٹ ایں شما تھنا نہ اِنت۔
آئی ءَ گوشتگ کہ ما گوستانک ءَ چار ایں گڑا چہ بلوچ ءَ زمین ءِ پلگ ارزاں نہ بوتگ، بلوچ ءَ مدام پہ وتی زمین ءَ ساہ ندر کرتگ اَنت۔ وار ءُ در پہ در بوتگ بلے آئی زوراکی نہ من اتگ۔ ھمے مڈیانی سوب ءَپاکستان بلوچ ءَ جنگ ءُ کشگ ءَ اِنت، بلے پیش ءَ بلوچ سرپد نہ بوتگ کہ اے زمین ءِ چیر ءَ مادن ھست۔ بلوچ ءَ گوں اے زمین ءِ ھاک ءُ آپ ءَ مھر کرتگ۔ ما گندگ ءَ ایں یک زورگریں ریاستے ھست کہ آئی پندل باز اَنت۔ آئی مستریں پندل ھمیش اِنت کہ آ کجام وڑ ءَ بلوچ ءَ ھلاس بہ کنت، چون آ بلوچ ءَ لب بہ دنت ءُ چہ وتی دودمان ءَ دور بہ دار ایت۔
ڈاکٹر ماہ رنگ ءَ گوشتگ کہ ھما روچ ءَ اے ریاست جوڑبوتگ آئی مستریں پندل ھمے بوتگ کجام وڑ ءَ بلوچ ءَ بھر ءُ بانگ ءُ ھلاس بہ کنت۔ آئی ھمک جاہ ءَ وتی سپاھی آرتگ اَنت کہ آ بلوچ ءَ بہ تر سین ایت ءُ بلوچ یکجاہ مہ بیت۔ زورگپتی ءِ باز وڑ ءُ پیم ھست اَنت، آئی مستریں وڑ ھمیش اِنت کہ زورگپتیں راج بھر ءُ بانگ بہ بیت۔ ریاست ءَ ھمے پندل ساز اتگ کہ گوادر ءَ چہ بلوچستان ءَ جتا بہ کنت۔ آ ھمے پیش دارگ لوٹ ایت کہ تو گوادری ءِ گڑا بلوچے نہ ئے۔
آئی ءَ گوشتگ کہ بیست ءُ یک دسمبر ءَ من وھدے اسلام آباد ءَ شتگاں من ءَ تھنا دو سد جنین گون بوتگ کہ آیانی بچ ھمیشانی زندانانی تہءَ بندیگ اَنت۔ بلے آیاں بلوچ ءِ دو سد جنین اود ءَ نہ اشتگ ءُ گوشتگ کہ ایشان بہ کش اِت۔ ھما بلوچ سرڈگار ءِ سر ءَ آیاں پہ وت ءَ ماڑی بستگ ءُ نادراہ جوڑ کرتگ۔ چہ گواد ر ءَ ابید بلوچستان ءِ ھمک شھرءَ چار ئے گڑ ا زورگر ءِ کینٹ ھست اَنت۔ بلے مئے بلوچ بلوچستان ءَ وت ءَ جتائیں ھندانی مردم لیک ایت چی ءَ کہ آیاں ھمے وڑ گوشگ بوتگ۔ آ ھمے لوٹگ ءَ اِنت کہ بلوچ وت ءَ بھر ءُ بانگ بہ کنت۔
ڈاکٹر ماہ رنگ ءَ گوشتگ کہ بلوچستان ءَ مردم چہ وتی جند ءِ ھنکین ءَ گلینتگ ءُ بے گس کرتگ اَنت ءُ باھوٹیانی وڑ ءَ زند گوازینگ ءَ اَنت۔ آئی بلوچ ءَ را تھنا گوں توپک ءَ نہ کشتگ بلکیں چہ بلوچی ءَ ھلاس کنگ ءِ جھد کرتگ۔ ھمے گوادر ءِ دریا ءِ تہ ءَ پانگس جنگ بوتگ اَنت ءُ ھمک جاہ ءَ ماھیگیردارگ ءُ جست گرگ بنت۔ نیوی ءِ کار مردمانی پھازداری اِنت آ بلوچاں دلسیاہ کنگ ءَ اِنت۔ زورگر ءَ چہ ھشکی ءَ بگر داں دریا ءَبلوچ ءَ تنگ کرتگ اَنت۔
آئی ءَ گوشتگ کہ چہ ڈیر بگٹی ءَ گیس درکیت ءُ پنجاپ ءَ سر اِنت بلے ڈیرہ بگٹی ءِ مردم بزگ کنگ بوتگ اَنت۔ چہ مچ ءُ بولان ءَ اشکر درکیت آئی تیوگیں پاکستان رژنا کرتگ بلے بلوچ ءِ گس ءَ انگت ءَ تھاری اِنت۔ کوھلو ءَتیل درکیت گڑا نواب ھیر بکش مری گوش ایت کہ کوھلو ءِ دگ شرکنگ مہ بنت ءُ تیل کشگ مہ بیت چیءَ کہ اے تیل تھنا کوھلو ءِ مریانی نہ اِنت سرجمیں بلوچ راج ءِ اِنت۔ ھمے وڑا گوادر ءُ گوادر ءِ زر سرجمیں بلوچ راج ءِ اِنت ایشی کس دات نہ کنت۔ پہ مئے بھر ءُ بانگ ءَ ھر وڑیں جھد کنگ بہ بیت بس مارا یک چیزے یکجاہ کنت آ مئے ھمت اِنت۔ مارا پچار اِت کہ ما ھر جاہ ءَ یک وڑ ءَ بے وس گندگ بہ ایں۔
ڈاکٹر ماہ رنگ ءَ گوشتگ کہ انچوش گوشگ بیت تو داں ھما وھد ءَگھگیری کرت نہ کن ئے دانکہ وتی دژمن ءَ مہ زان ئے ءُ گوں کیا جنگ کنگ ءَ ئے۔ گڑ امئے دیم ءَ مرچی ریاست اِنت ءُ آئی پشت ءَ دگہ لٹ ءُ پلیں توانمند اَنت کہ آ مارا ایردست کنگ ءُ مئے مڈیاں وتی دست ءَ کنگ لوٹ اَنت۔ چہ آئی ءَ مستریں دژمن ھما نپ دوستیں مردم اَنت کہ مئے میان ءَ ساڑی اَنت ءُ مئے سودا ءِ جنگ لوٹ اَنت۔
آئی ءَ گوشتگ کہ مرچی اے تیاب ءُ کوہ مارا گوانک جنگ ءَ اَنت ما چہ ھپتاد سال ءَ گیش اِنت ایردست ایں مارا بہ رکین اِنت۔ اگاں ما مرچی جھد نہ کرت دیم ءَ بہ گند ئے ھمے دریا ءُ کوہ بہ بنت بلے بلوچ پشت نہ کپ ایت۔ مئےءُ شمئے پروش دیوک سک باز اَنت ، بلے مئے یکجاہ کنوک بس یکے۔ مارا ماتاں لولی داتگ مہ ترس ات بلے اے ریاست ءَ مارا ترس آماچ کرتگ۔ نوں ما ھرچی گند ایں بس ترس ءَ ھچ مہ گوش ایں۔ اے دگانی سر ءَ پانگس پمیشکا جنگ بوتگ اَنت کہ بلوچ وتی مڈیاں مہ گند یت۔