شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5377 روچ سرجم بوتگ۔یک شمبے ءِ روچ ءَ چہ پسنی ءَ سیاسی ءُ چاگردی کارکن سلمان الی،سید ، یاسر،راشد ءُ ریھان، چہ گارڈن کراچی ءَ ھمل پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءِ لبز وھدے زبان ءَ کیت گڑا ماردم ءِ تہ ءَ مارشتے ودی بیت ءُ جنگی پڑے گمان ءَ کیت۔ اود ءَ مردم ھرنیمگ ءَ آس ءَ سچگ ءَ گندگ بنت ءُ توپک ءُ بمبانی گرند، بلوچ ءِ آہ ءُ اپارانی توار اش کنگ بیت۔
آئی ءَ گوشتگ کہ اے کپتگیں لاشانی تہ ءَ ماتانی جگر ءِ ٹکٹر، گھارانی ارمان، بلوچ ءِ جزبگ ، واھشت ءُ واب ھم ٹکٹر ٹکٹر بوگ ءَ اَنت۔ بلوچ درد ءُ دوارانی تہ ءَ ھون ءِ ارس گوارگ ءَ اَنت۔
ماما کدیر گوشتگ کہ بلوچانی جنگ برجاہ اِنت ھمے جنگ ءِ سوب ءَ شھیدنی ھون رچگ ءَ اَنت، اے جنگ بلوچ ءِ وشھالی، مردمگری، دودمان ءُ پدریچ ءِ مانزمان اِنت۔ جنگ آماچیں بلوچستان ءِ بارو ءَ رسانکدر ءَ گزارش کنگ ءِ موکل نیست ءُ آیا نی سر ءَ پابندی اِنت۔
