![](https://zrumbesh.com/wp-content/uploads/2024/02/1000231808-1024x576.jpg)
اسٹوڈنٹس ایکشن کمیٹی ءِ بنجاھی جارکش ءَ وتی شنگ کرتگیں درشانے ءَ گوشتگ کہ گل ءِ پنجگور ھنکین ءِ کارمستر زاھرءِ گوں پنچ ھمراہ شھاب، شھیب، شیھک، اھمد ءُ سھیل ءِ گوستگیں روچ ءَ ماں وندر ءِ تورناکیں ویل ءِ بیرانیءَ ادارہ درد ءُ رنج ءُ موتک ءِ درشان ءَ کنت۔ گل ءِ باسمائیں کیڈر ءُ کمٹیڈیں سنگت زاھر، شھاب ءُ شھیب ءِ گوں ھمراھاں ھوار دردناکیں نمیرانی پہ ادارہ ءُ بلوچ راج ءَ مزنیں تاوانے۔ گم ءُ رنجانی اے تورناکیں ساھتاں زاھر ءُ ایدگہ ورنایانی کھولانی گون ءَ ھوار ایں۔ اے باسمائیں بلوچ ورنایانی چوشیں روگ نہ تھنا پہ آھانی کھولاں بگندئے پہ سرجمیں راجءَ مزنیں تاوانے۔ زاھر چہ گوستگیں پنچ سالاں بلوچ اسٹوڈنٹس کونسل ءُ بلوچ اسٹوڈنٹس ایکشن کمیٹی ءِ تلواں بلوچ نودربر سیاست ءِ بھر بیت ءُ پہ ورنایاں مدام نودربر سیاست ءِ دیمی سرپ ءَ ساڑی ئیں ورنا یے ات۔ آ یک باسما، وانندہ ءُ با کردیں جھدکارے ءَ ات کہ آئی ءِ چوشیں روگ تیوک ءَ پہ گل ءُ ورنایاں مزنیں تاوانے۔
بنجاھی جارکش ءَ گوشتگ کہ زاھر ءُ ایدگہ ورنا تھنا وانگی میدان ءَ نا بگندئے سیاسی میدان ءَ ھم دلجمی ءَ ھوار بوتگ انت، ءُ شپ ءُ روچ پہ بلوچ ورنایانی سمائی ھیلکاریءَ جھدءَ بوتگ انت۔ زاھر چہ وتی درکسانی ءَ راجی درد ءَ ماریت ءُ یک نودربرے ءِ بستار ءَ وتی راجی کرد ءَ پیلو کنت۔ زاھر نودربر سیاست ءِ ھمراھی ءَ کتاب دوستیں ورنا یے اَت ءُ بلوچ ورنا ءُ چاگرد ءِ میان ءَ کتاب کلچر ءِ دیم ءَ آرگ ءَ مزنیں کردارے ات۔ گل ءِ کتاب کاروان ءِ مراگش ءِ دیم ءَ برگ ءَ زاھر ءِ مزنیں کردے۔ ایشاں ابید پنجگور ءِ وڑیں دمگے ءَ کہ اود ءَ ورنا یک ترسے ءِ دام ءَ پس اتگ اَنت، ھمود ءَ آئی ءَ نودربر سیاست ءِ برجاہ دارگ ءَ وتی دلجمیں کردے کسانیں مدت ےءِ میانءَ پیلو کت۔ زاھر ءُ آئی ھمرایانی راجی جزبگ ءُ کرد پہ مدام ءَ یات دارگ بنت۔
بنجاھی جارکش ءَ وتی درشان ءَ گیش گوشتگ کہ زاھر نودربر سیاست ءِ ھمراھی ءَ یک مھروانیں مردمے ات۔ زاھر، شھاب، شھیب ءُ آیانی ایدگہ ھمراہ بلوچ راج ءِ ھزانگ بوتگ اَنت۔ بلوچ راجی باندات ءِ چراگانی چوش اے پیمیں دگ ویلاں ناگھانی روگ بے اوپاریں مزنیں تاوانے۔ سرجمیں بلوچستانءَ انچوشکہ مھلوک ءِ زندمان ایدگہ ھزاراں جنجالانی دیمپان اَنت ھمے پیم ءَ دگ اوں پہ بلوچ مھلوک ءَ کُشندہ جوڑ اَنت۔ بلوچستانءَ ھمک سال ھزارانی کچ ءَ مردم ھمے دگ ویلاں نمیران بنت۔
جارکش ءَ وتی درشان ءِ گڈی ءَ گوشتگ کہ زاھر ءُ آئی ھمرایانی نمیرانی ءُ تورناکیں روگ ءُ اے گرانیں ساھتاں ادارہ زاھر ءُ ایدگہ ورنایانی کھولءِ گون ءَ ھوار اِنت۔ زاھر ءُ ایدگہ سنگتانی سوچ ءُ پکر ءُ لیکہ مدام یات دارگ ءُ مھکمی گون دیم ءَ برگ بنت۔