گودار ءِ ھند جیمڑی ءَ رسول بکش چاراہ ءَ بلوچ یکجھتی کمیٹی ءِ سروک ڈاکٹر ماہ رنگءَ مچی ءَ تران کرتگ ءُ گوشتگ کہ گوادر شھر مرچی ھم ھما وڑ اِنت کہ گوستانک ءَ بوتگ، وتگڑیں دیمروئی ءِ اوگام جنوکاں دروگ بستگ، آیاں ھما شھر دیم ءَ آرتگ کہ آ سرکار ءِ شھر اِنت پورٹ پہ بلوچ ءَ جوڑ کنگ نہ بوتگ۔ ما وتی راج ءِ بزگی ءُ بے وسی ءَ چاریں گڑا مارا درد بیت۔ بلوچ ءِ کر ءَ پہ ورگ ءَ نان نیست آیانی ھما کہ گس بوتگ اَنت آھم مرچی نیست اَنت۔ مرچی ریاست چہ وتی پندل سازیاں اد ءِ تاوان ءَ چیر دیگ ءَ اِنت کہ ھچ تباھی نبوتگ،پیشکا کہ ریاست ءَ بلوچ ءِ زمین درکار اِنت۔ آئی ءِ کر ءَ بلوچ ءَ را ھچ وڑیں بستار نیست۔ھما مردمانی کہ گس گپتگ اَنت ھما گس ءِ اکس ءَ کش اَنت مارا پنڈگ بہ رس ایت اے مئے ءُ شمےکمک ءَ نہ کنت مارا ءُ شمارا وتی راج ءِ کمک وت کنگ لوٹ ایت۔
آئی ءَ گوشتگ کہ ریاست ءَگوادر ءَ اے وھد ءَ دو شھر جوڑ کرتگ، یک شھرے ریاست ءِ شھر اِنت ءُ یک شھرے بزگیں بلوچ ءِ اِنت۔ مارا شمارا اے گپ سرپد بوگی اِنت کہ اے توپان مئے ءُ شمئے سر ءَ آتکگ اے گیبی توپانے نہ اِنت اے ریاست ءِ نیمگ ءَ آرتگیں توپانے۔ آدگہ جاھاں سے سے روچ ءَ ھار بیت کس ءَ ھار نہ بارت بلے بلو چ ءِ شھر ءِ تہ ءَ مارا یک روچے ءِ ھور ءَ ھار بارت۔ مارا بلوچ ءِ ملاھانی نیمگ ءَ رد دیگ بوتگ کہ اے بلوچ ءِ کسمت اِنت ھار ءَ برتگ، بلے بلوچ ءِ کسمت نہ اِنت اے ریاست اِنت۔
ڈاکٹر ماہ رنگ ءَ گوشتگ کہ بلوچ راج ءَ سرپد بوگ لوٹ ایت ما انچیں سرڈگارے ءِ واھندیں کہ اے سرڈگار چہ مادن ءَ سریچ اِنت مارا دگہ مردمانی کمک درکار نہ اِنت۔ بلوچ ءَ ھزار سال اِنت کہ وتی اے زمین ءِ سر ءَزندگی کرتگ ۔ بلوچ ءِ شرپ ءِ روزگار یکے دریا ءُ دومی سیمسر اِنت بلے پہ یک ٹوکنے ءَ بلوچ کمشرپ کنگ بوگ ءَ اِنت۔ اے ھما زورگراِنت گوش ایت بلوچ پہ روزگار ءَ بیت مئے پاداں زیارت بہ کنت، اے مارا تھنا وتی دست ءَ کشگ نہ لوٹ ایت بلکیں پہ گژن کشگ لوٹ ایت۔
آئی ءَ گوشتگ کہ راج ءِ چم مئے سر ءَ سک اَنت نوں مارا سوڑگ لوٹ ایت کہ ما چے کرت کن ایں۔ بلے بلوچ ءَ رد کپگی نہ اِنت۔ یات نہ کن اِت کہ اے ریاست ءَ لشکرکشی کرتگ ءُ گس گس ءَ بیڑ برتگ، مئے ورنائیں بچ برتگ اَنت ءُ آیانی لاش چگل داتگ اَنت۔ پد ءَ پہ مئے رد دیگ ءَ مئے میان ءَ مردم جوڑ کرتگ ءُ گوشتگ کہ بلوچ ءِ جیڑہ روزگار اِنت۔ ھمے پیش دارگ بوتگ کہ بلوچ بے وس اِنت بلے بلوچ بے وس نہ اِنت بلکیں بے وس کنگ بوتگ۔ ھمے رستر آتکگ ءُ مئے سرڈگار دستیگ کرتگ ھما وھد ءَ آیاں بلوچ درکار بیت گڑا بلوچ ءِ گس گس ءَ کاینت ھما روچ ءَ بلوچ جنجالانی دیمپان بیت گڑا کس نہ ایت۔
ڈاکٹرماہ رنگ ءَگوشتگ کہ من شمارا ھمے گپ ءَ گوشگ لوٹاں کہ اے تباھی اد ءَ نہ اوشت ایت اے تباھی دیم ءَ روت۔ ریاست مدام مئے ءُ شمئے سر ءَ ھمے وڑ زوراکی کنت اے نوں مئے شمئے دست ءَ اِنت کہ ما چون دیم پہ دیمی کن ایں۔ ھرچی کہ شمئے وس رس ایت وتی بزگیں مردمانی وت کمک ءَ بہ کن اِت۔ وتی مردماں مھر ءُ شرپ بہ دے اِت۔ وت ءَ چہ نشہ آماچی ءَ در بہ کن اِت۔ بیا اِنت پہ وت ءَ کار بہ کن اِت ءُ بوان اِت۔ ھما پندل ساز کہ بلوچ ءَ بھا کنگ لوٹ ایت ما آئی دیم ءَ اوشت ایں ءُ ھمے گوش ایں کہ اد ءَ پہ بھا کنگ ءَ ھچ نیست یک راجے پہ وتی باندات ءَ جھد کنگ ءَاِنت۔
آئی گوشتگ کہ مئے مردمانی درس پلگ بوتگ اَنت نوں مارا وتی مردمانی وت ھمکوپگ بوگی اِنت۔ مارا وتی مردمانی کر ءَ روگی اِنت چہ نشہ ءَ رکینگی اَنت ءُ بلوچ راجی جھد ءَ گوں ھمگرنچ بوگی اِنت۔ پہ بلوچ ءَ پارلیمنٹ ءِ تہ ءَ بس تماشا بوگ ءَ اِنت دگہ ھچ نیست۔ بلوچ ءِ پارلیمنٹ شما اِت شما وت سوڑگ بہ کن اِت کہ بلوچ ءَ کجام نیمگ ءَ برگ لوٹ اِت۔ اے سرکار ءَ مئے لاشانی سود ءَ جتگ، اے سوداجنوکیں ریاستے۔
ڈاکٹر ماہ رنگ ءَ گوشتگ کہ اچمن پیش ھم اد ءَ جھدکار آتکگ اَنت ءُ آیاں ھمے گوشتگ کہ اے ریاست پہ مئے دیمروئیءَ ھچ نہ جیڑ ایت، ایشی دانکہ مئے پچار ھلاس نہ کرتگ ھمے وڑ ءَ زوراکیاں برجاہ دار ایت آیانی ھما گپ راست اَنت، اے نوں مئے ءُ شمئے سوڑگ اِنت کہ ما تی راج ءِ چون ھمکوپگ بہ ایں ءُ وتی راج ءَ دیم ءَ بر ایں۔ اد ءَ سرکار نیست آھمے لوٹگ ءَ اِنت اد ءِ مردم مہ مر ایت من آیانی اکساں بگراں ءُ آیانی نام ءَ پہ وت ءَ پنڈگ بہ لوٹاں۔
آئی ءَ گوشتگ کہ ھما مردم شمئے سودا ءَ جنگ لوٹ ایت گڑا آئی ءَ بہ گوش اِت کہ اے شھیدانی سرڈگار اِنت پہ اے سرڈگار ءَ بلوچ ءَ وتی ھون داتگ اَنت۔ ما ھما راج ایں کہ چہ مئے جھد ءَ نہ تیوک ءَ پاکستان نہ بلکیں کر ءُ کشانی درسیں راج سانمند اَنت ھما وڑ ءَ بلوچ ءَ وتی جھد دیمءَ برتگ ما ھما وڑ جھد بہ کن ایں گڑ ا ماپرچہ وتی راج ءِ سر ءَ پھر مہ بند ایں۔ مئے شھیدیں راھشونان ھما لیکہ دیم ءَ آرتگ انگت ءَ آ کس ءَ نیارتگ۔ اے وڑیں سکانی تہ ءَ جھد کنگ ءُ وتی زرمبشت ءِ دیم ءَ برگ ءَ بھادری لوٹ ایت۔ اے مچی ءِ بلاھیں زورے، ما یک یک بوتیں پروشگ بہ بہ ایں اگاں ما یکجاہ بوتیں ما کدی پروشگ نہ بہ ایں۔ پاکستان ءِلشکر بھا بوتگیں لشکرے ءُ اے زر دنت ءُ وتی مردماں کار ایت۔
ڈاکٹر ماہ رنگ ءَ گوشتگ کہ اے کلوہ ءَ گس پہ گس ءَ سر بہ کن اِت کہ اے وڑیں جنجالانی وھد ءَ شمئے راج ءَ پہ شما کار اِنت۔ ھمے تباھی کہ ما ءُ شما دیستگ اَنت اے تباھیاں پاکستان ءِ وتگڑیں جھگیر ءُ رسانکدر کدی دیم ءَ نیار اَنت گوادر بھا بوتگ۔ مرچی لکانی کچ ءَ مردم ھمے دلارانی سوب ءَ بے روزگار اَنت۔ ھما مردم کہ وتی راج ءُ سرڈگار ءِ سودا ءَ جنت آ کدی راجکار گوشگ نہ بیت۔
آئی ءَ گوں جنیناں دلگوش گور کرتگ ءُگوشتگ کہ اے گرانیں ساھتاں مئے راج ءَ مئے کمک درکار اِنت۔ ما وت ماں وت تپاک بہ بہ ایں ایشاں مارا ھما وڑ کہ بھر کرتگ ما وتی ھما گستائی ءَ ھلاس بہ کن ایں۔ مئے درد ءُ دور یک اَنت۔ اگاں مرچی بلوچ ءَ یک راجے ءِ بوگ ءِ سوڑگ نہ کرت اے ریاست ھمےوڑ کنت، برے ھار مارا کش اَنت ءُ آئی لشکری مئے گساں بیڑ بر اَنت ءُ مارا کش اَنت۔ دہ دہ سالاں ماتانی زھگ بیگواہ کنگ بنت۔
ڈاکٹر ماہ رنگ ءَ گوشتگ کہ راجی کمک ھر وڑیں بوت کنت اگاں یکے ءِ گس پرشتگ ءُ آئی ءَ نان درکار اِنت ب نان بدے، ھمے چیز ءَ پیش بدار اِت کہ ما جنجالانی وھد ءَ وتی راج ءِ گون ءَ اوشتاتگ ایں۔ ھماھی کہ مارا بھر کرتگ آئی ءَ ھمے کلوہ ءَ بدے بلوچ یک راجے۔ تو ھرچی جھد بہ کن بلے ما نہ پرش ایں، مارا برتانیہ ءَپروشت نہ کرتگ ما انوں ھم نہ پرش ایں۔
آئی ءَ گوشتگ کہ منی لوٹ چہ شما ھمیش اِنت یکجاہ بہ بہ اِت ءُ اے جھد ءَ دیم ءَ بہ بر اِت بلوچ ءَ ابید جھد ءَ دگہ راہ نیست۔ اگاں جھد نہ کرت اے پاکستان داں ھما وھد ءَ چکچینی کنت داں یک بلوچے زندگ اِنت۔ ھما دریا کہ بلوچءِ روزگار اِنت پہ دریا ءَ روگ ءَ بلوچ کمشرپ کنگ بیت۔ اے درآمداں پیش دارگ لوٹ ایت کہ بلوچ یک زندگیں راجے۔ وھدے کہ ما گوں وتی سرڈگار ءَ مھر بہ کن ایں گڑا مارا گوں وتی راج ءَ مھر بیت۔ اد ءَ چہ مردماں ابید مارا گوں اد ءِ درچک ءُ داراں مھر کنگ لوٹ ایت۔ وھدے کہ ریاست زوراکی کنت گڑا ما جھد کن ایں ، ھمت ءِ دیم ءَ مزن مزنیں ریاست ھم پرشتگ اَنت۔ ما گون ھمت ءَ دیم پہ دیمی کن ایں۔
