گوٹگن: بی آر پی ءِ نیمگ ءَ بلوچستان ءَ پاکستانی لشکر ءِ لشکرکشی، زوراکی، زوریں بیگواھی ءُ دروگیں میڑاں زور بیگواھیں مردمانی ناھکیں کوش ءِ بگیری ءَ جرمنی ءِ شھر گوٹگن ءَ زھرشانی کنگ بوتگ۔
زھرشانی ءَ مردماں تران کرتگ ءُ گوشتگ کہ بلوچستان ءَ ھمک روچ ءَ پاکستانی لشکر ءِ زوراکیانی تہ ءَ ترندی گندگ بوگ ءَ اِنت۔ گوستگیں چنچو روچ اِنت کہ بولان ءَ پاکستانی لشکر ءِ لشکرکشی برجاہ اِنت۔ اے لشکر کشی ءِ میان ءَ بازیں مردم زور بیگواہ کنگ بوتگ، بازیں مردمانی گس سوچگ، مال ءُ دلوت ءَ برگ بوتگ اَنت۔
آیاں گوشتگ کہ ڈیرہ بگٹی ءَ ھوار تیوگیں بلوچستان ءَ پاکستانی لشکر ءِ نیمگ ءَ زوریں بیگواھیانی درچ یکشل ءَ برجاہ اِنت۔
زھرشانی کنوکیں مردماں گوں میان استمانی مردمی ھکانی ادارہ ءُ شرپمندیں ڈیھانی گون ءَ لوٹ کرتگ کہ بلوچستان ءَ برجاھیں ریاستی ناشرکاریانی گِر ءُ دار کنگ ءَ وتی کرد ءَ پیلو بہ کنت۔
