بلوچ نودربر گل آزاد ( بی ایس او آزاد) ءِ بنجاھی جارکش ءَ وتی شنگ کرتگیں درشانے ءَ گوشتگ کہ اے وھد ءَ بولان ءَ روگ ءُ آھگ ءِ درسیں راہ بند اَنت۔ مردماں درماناں ھوار پہ بنکی ساماناں جنجالانی دیمپانی اِنت۔ ھندی مردم ریاستی لشکر ءِ نیمگ ءَ لٹ شاپ، گوں آیاں زوراکی ءُ زور بیگواہ کنگ بوگ ءَ اَنت۔ لشکر کشی ءَ اے میان ءَ باز مردم آوار جنگ بوتگ، کوھانی تہ ءَ کسانیں میتگاں سوچگ ءُ مردماں پہ لڈءُ بار کنگ ءَ لاچار کنگ ءَ اَنت۔
آئی ءَ گوشتگ کہ ریاسست گوں وتی توپاں اے وھد ءَ بلوچ میتگاں نشانگ کنگ ءَ اِنت چہ ایشی ءَ ھندی مردم سکا ترس آماچ اَنت۔ پہ لشکرکشی ءِ نام ءَ مردمانی آوار جنگ ءُ کشت ءُ کوش ءَ دزگٹ اِنت گوستگیں ھپت روچ اِنت کہ لشکرکشی دراجکش کنگ بوتگ۔ جتائیں ھنداں راہ بندوک اَنت ءُ چہ ھندانی انگر کنگ ءَپہ مردمانی تاوان بوگ ءِ ترس گیش بوان اِنت۔
جارکش ءَ دیمتر ءَ گوشتگ کہ بلوچستان ءَ ریاست ءِ لشکرکشی مدام پہ لس مردمانی بگیر ءَ اِنت۔ پہ بلوچ ءِ گھگیری کنوکانی گون ءَ میڑگ ءِ نام ءَ ریاست ءَ بلوچانی زندمان جنجال کرتگ۔ چنچو ھزار بلوچ اے وھد ءَ ریاست ءِ آزارجاھاں بندیگ اِنتءُ چنچو ھزار بلوچ دروگیں میڑاں کشگ بوتگ اَنت۔ انوگیں روچاں بولان ءِ جتائیں ھنداں برجاھیں لشکر کشی ءِ بنکی مول لس مردمانی ترس آماچ کنگ اِنت۔ بولان، سبی ءُ ھرنائی ءِ جتائیں ھنداں برجاھیں لشکر کشی ءَ ھزارانی کچ ءَ لشکری کارمنداں بھر زرتگ کہ جتائیں ھنداں کشت ءُ کوشاں ھوار اَنت۔
آئی ءَ گوشتگ کہ انوگیں روچاں جتائیں ھنداں ھورانی سوب ءَ مردماں بنکی آسراتی درکار اِنت، بلے لشکری کارمندبازیں کچے ءَ ساڑی اَنت آڑاند ودی کنگ ءُ راھاں بند کنگ ءَ اَنت چہ ایشی ءَ گیشتر جنجالانی دیمپانی اِنت۔ پہ لشکرکشی ءِ نام ءَ مارا ھمے ترس اِنت کہ گیشتر مردم زور بیگواھی ءِ نشانگ بیت ءُ دروگیں میڑاں کشگ ءُآیاں گھگیری کنوک پیش دار اَنت۔ زورگریں ریاست ءَچنچو سال اِنت ھمے ھیلھاں کارمرز کنگ ءَ اِنت ءُ بلوچ چکچینی ءَ گیش کنگ ءَ اِنت۔
جارکش ءَوتی درشان ءِ گڈی ءَ میان استمانی تک دلگوش دیگ لوٹ اِتگ کہ زورگریں ریاست ءِ اے درسیں کاروائی چہ جتائیں ڈیھانی نیمگ ءَ رستگیں لشکری کمک ءِ سوب ءَ بوگ ءَ اَنت۔ میان استمانی ڈیھانی نیمگ ءَ زورگریں ریاست ءَاے کمک پہ ناشرکاری ءِ بگیری ءَ مڑگ ءَ دیگ بوگ ءَ اَنت، بلے راستی ءَ ریاست اے کمکاں دمگ ءِ تہ ءَ پہ ناشرکاری ءَ کارمرز کنگ ءُ چہ اے کمکاں بلوچ ءِ بگیری ءَ زوراکی ءُرستری کنگ ءَ اِنت۔ میان استمانی تک ءَ اے گپ دلگوش دیگ لوٹ ایت کہ ریاست چہ جھان ءَ ناشرکاری ءِ نام ءَگپتگیں کمکاں کج ءَ کارمرز کنگ ءَ اِنتءُ اے کمک زوت دارگ لوٹ اَنت۔
