![](https://zrumbesh.com/wp-content/uploads/2024/02/Hub-Transporter-Protest.jpg)
وندر: پاکستانی لشکر ( کوسٹ گارڈ) ءِ نیمگ ءَ ھندی مردمانی دلسیاہ کنگ، میتگاں بیڑ برگ ءُ چادر ءُ چاردیوالیانی لپاشگ، پہ نشہ گِر ءُ دار ءِ نیمون ءَ ناکہ کھارڑی ءِ پانگسءِ نزیکیں میتگانی دگانی پروشگ ءِ بگیری ءَ مردماں زھرشانی ءَ شال کراچی شھدگ بند کرتگ۔
زھرشانی کنوکیں مردمانی گوشگ اِنت کہ پاکستانی لشکر ھمک روچ مئے گساں بیڑ برگ ءَ اِنت ، چادر ءُ چاردیوالیاں لپاشگ ءَ اِنت۔ گوں مردماں ناھک ءَ زوراکی کنگ ءَ اِنت۔
آیاں گوشتگ کہ زی ناکہ کھارڑی ءَ پاکستانی لشکر ءِ کارمنداں پہ وتی بے سوبیانی چیر دیگ ءَ میتگانی نیمگ ءَ روکیں دگانی سر ءَ بلڈوزر ءِ گوں کڈ جتگ ءُ بستگ اَنت، دگانی بند بوگ ءِ سوب ءَ مردم سکا جنجالانی دیمپان اَنت۔
زھرشانی کنوکیں مردماں گوں وتگڑیں سرکار ءَ لوٹ کرتگ ءُ گوشتگ کہ ناکہ کھارڑی ءِ کوسٹ گارڈ ءِ کارمندانی زوراکیانی بارو ءَ دلگوش ءَ گور بہ کنت ءُ لشکر ءِ زوراکیاں گِر ءُ دار بہ کنت، اگاں نہ گڑا ما وتی زھرشانی ءَ ترند کن ایں۔
زھرشانی کنوکیں مردم ءُ واکدارنی نیمگ ءَ گپ ءُ تران سوبین بوتگ ءُآیاں وتی زھرشانی ھلاس کرتگءُ شھدگ پچ کرتگ۔