شال:پہ زور بیگواھیں مردمانی پدجنگ ءَ شدکشیں زھرشانی گدان ءَ 5363 روچ سرجم بوتگ۔سے شمبے روچ ءَ گیشیں ھور ءُ سارتی ءَ ابید چہ شال ءَ جتائیں سیاسی ءُ چاگردی کارکن پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچ سیاسی کارکن ءُ شھریانی ھوناں ریاست ءِ بگیری ءَ کینگداری گیش کرتگ۔ تیوک ءَ پہ بلوچ کارکنانی زوریں بیگواھی ءَ پد آیانی ژانگولیں لاشانی دزکپگ ءَ بلوچ چاگرد ءِ تہ ءَ ھرنیمگ ءَگھگیری ترند کرتگ۔
آئی ءَ گوشتگ کہ ریاست چہ وتی ردیاں دربرگ ءَ نہ اِنت ءُ بلوچ چکچینی ءَ تیز کنگ ءَ اِنت، پاکستانی لشکرءَ بلوچستان ءَ ھونریچیں لشکرکشی یے بندات کرتگ۔ ژانگولیں لاشانی دزکپگ ءَ ترسے ودی کرتگ ءُ بنگلہ دیش ءِ زوراکی چکاسگ بوگ ءَ اَنت۔
ماما کدیر دیمتر ءَ گوشتگ کہ وی بی ایم پی ءَگوستگین پانزہ سال بیت کہ یکشل ءَ پہ زور بیگواھیں مردمانی آجوئی ءَ زرمبشتے برجاہ داشتگ۔ ما جھان ءَرا اے گپ ءِ دلجی دیگ ءَ سوبین بوتگیں کہ بلوچستان یک جنگ آماچیں دمگے کہ اد ءَ پاکستانی لشکر مردمی ھکاں لپاشگ ءَ اِنت۔ ما چہ اکوام متھدہ ءُ میان استان ءَ ھمے لوٹ کرتگ کہ پاکستان ءَ بلوچ چکچینی ءِبارو ءَ جست بہ کنتءُآئی دارگ ءَ وتی کرد ءَ پیلو بہ کنت۔
