پنجگور: دہ سال پیش پاکستانی لشکر ءِ دست ءَ زور بیگواہ کنگ بوتگیں سنا اللہ نور ءِ گھار سلمہ ءَ وتی تامربندے ماں رسانکدر ءَ شنگ کرتگ ءُ پہ وتی برات ءِ آجوئی ءَ توار چست کنگ ءِ لوٹ کرتگ۔
آئی ءَ گوشتگ کہ منی برات دہ سال پیش شش اپریل 2014 ءَ چہ گچک پنجگور ءَ زور بیگواہ کنگ بوتگ۔ دہ سال اِنت کہ من ءُ منی مات ءُ پت دردناکیں زندے گوازینگ ءَ ایں، من انوں اسلام آباد ءَ زھرشانی ءَ ھم بھر زرتگ بلے من ءَ منی برات ءِ بارو ءَ ھچ وڑیں سرپدی دیگ نہ بوتگ۔
سلمہ ءَ گوشتگ کہ 27 پروری 2024 ءَ من پہ وتی برات ءِ آجوئیءَ گوں بلوچ وائس پار جسٹس ءِھواری ءَ چاگردی رسانکدر ایکس ءَ کمپئینے برجم دارگ ءَ ایں ، من گوں رسانکدری کارکناں ھوار گوں درسیں بھرگاں سیادی داروکیں مردماں لوٹ کناں کہ بھر بزور اَنت۔
آئی ءَ گوشتگ کہ اے کمپئن شپ ءِ ھپت ءَداں داوزدہ ءَ برجاہ بیت، پہ منی برات ءِ سلامتی آجوئی ءَ توار چست بہ کن اِت ءُ ھیشٹیگ #ReleaseSanaUllahNoor کار مرز بہ کن اِت۔
