بلوچ راجی زْرمبشت ( بی این ایم ) ءِ چاگردی گھبودی تک ءَ ماں آواران ھنکین ءِ چار ھند جاھو ، آوران ءُ مشکے ءِ جاندْراھی جاور ءِ سر ءَ گزارش جوڑ کرتگ ءُ ھمے رد ءَ وتی بے تاھیری درشان کرتگ۔
گزارش ءِ رد ءَ آواران ءِ اے چاریں ھنداں 29 جاندْراھی بنجل نیم پرکار ، ناپرکار ءُ چہ آسراتیاں زبھر اَنت۔
’’ جاندْراھی آسراتیانی نہ بیگ ءَ چہ کسان کسانی نادْراھیاں ھم مردم مرگ ءَ اَنت ، راہ شر نہ اَنت پمیشکا ناگیگیں جاوراں نادْراھے کہ کراچی یا دگہ شھراں برگی بیت، نادراہ ماں راہ ءَ بیران بیت۔‘‘
گزارش ءَ گْوشگ بیتگ ، بلوچستان اے دیمروی کرتگیں زمانگ ءَ ھم پاکستان رنگیں دیمروی کنوکیں ڈیھے ءِ نوک آبادی یے، کہ آئی ءِ شھرمنند گوں زور ءَ مرگ ءِ کنڈ ءَ تیلانک دیگ بیتگ اَنت۔ یک نیمگے مھترھند گوں وتی سرجمیں واک ءُ توان ءَ بلوچ چاگرد ءَ مردم کشگ ءَ اِنت ءُ دومی نیمگ ءَ بلوچ چاگرد ءِ تہ ءَ زند ءِ بنکی آسراتیانی نہ بیگ ءَ مرک ءُ میر گیشتر بیان اِنت ، کہ ایشی ءِ مانزمان پاکستانی مھترھند اِنت۔
بی این ایم چہ راجانی سنت ءُ دگہ ڈیھاں لوٹ کنت ، پاکستان بلوچستان ءَ ھرچ رنگ ءَ مردمی اگبالاں لپاشگ ءَ اِنت ءُ اگاں اے دْرچ برجاہ بہ بیت گڑا بلوچستان کشتار جاھے جوڑ بیت ، پہ ایشی ءِ دارگ ءَ میان استمانی دزمانجنی المی اِنت۔
