بولان: پنچ روچ اِنت کہ زورگریں پاکستان لشکر ءِ لشکرکشی برجاہ اِنت، لشکر کشی ءِ میان ءَ پاکستانی لشکر ءَ گساں بیڑ برتگ ءُ جنگل مانداشتگ اَنت۔
بنشون ءِ رد ءَ زی پاکستانی لشکر ءَ ھرنائی ءِ کوھاں پشتونانی وڑائچ ٹک ءِ شش مردم دزگیر کرتگ ءُ ھرنائی ءِ زندان ءَ دیم داتگ اَنت۔
پاکستانی لشکر ءَ سبی ءِ کوھاں شابان ءَ گسے ءَ بیڑ برتگ ءُ جنین ءُ زھگ بندیگ کرتگ اَنت۔ چہ ایشی ءَ ابید ڈاڈر ءُ مچ ءَ بازیں جاھاں پاکستانی لشکر ءَ بیڑ برتگ ءُ گوں مردماں زوراکی کرتگ۔
ھندی بنشونے ءِ رد ءَ ھرنائی ءِ میان کور ءَ زورگریں پاکستانی لشکر بازیں کچے ءَ مچ بوتگ ءُ سانگھان ءِ نزیکیں کوھاں پاکستانی لشکر ءَ پانگس جتگ ءُ نشتگ۔
باز رند ءَ بولان ءِ جتائیں جاھاں جنگل ماندارگ بوتگ اَنت کہ چہ ایشی ءَ مال ءُ دلاوت، مرگ ھم ستکگ اَنت۔ پنچ روچ بیت کہ پاکستانی لشکر ءِ زوراکی یکشل ءَ برجاہ اَنت۔
