شال: پہ زور بیگواھیں مردمانی پد جنگ ءَ شدکشیں زھرشانی گدان ءَ 5360 روچ سرجم بوتگ۔ شمبے ءِ روچ ءَ بی ایس او ءِ سرکماش چنگیز ءُ کمک سرکماش جیھند، بنجاھی پتر ءِ باسک ھسیب، گپار، نسیر ءُ آدگہ مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ بلوچستان ءَ چنچو سال اِنت لشکرکشی برجاہ اِنت۔ چہ 2000 ءَ بندات کنگ بوتگ داں انوں گوں ترندی ءَ برجاہ اِنت۔ چنچو بلوچ پسگ پاکستانی چیریں ادارھانی دست ءَ زور بیگواہ کنگ بوتگ ءُ آزارانی دیمپان اِنت۔ ھزارانی کچ ءَ مردم درکانودی شھید کنگ بوتگ۔
ماما کدیر گوشتگ کہ بازیں مردمانی لاش چہ بلوچستان ءِ جتائیں ھند ءُ دمگاں دزکپتگ اَنت۔ توتک ءَ سدانی کچ ءَ زور بیگواھیں مردمانی مچی مانشجاھاں دست کپتگ اَنت کہ اے ریاست ءِ ناشرکاریانی منانک اَنت۔
آئی ءَ گوشتگ کہ پاکستان ریاست پہ وتی زورگپی ءِ برجاہ دارگ ءَ بلوچ راج ءِ سر ءَ ھر وڑیں زوراکیاں چکاسگ ءَ اِنت دانکہ آ بلوچ راج ءِ آھوکیں پدریچاں ھم ایر دست بہ کنت ءُ بلوچ ءِ مڈیانی لٹ ءُ پل ءَ بہ کنت۔ بلے بلوچ راج ءَ کدی ھم ریاست ءِ اے گپ نہ منّ اتگ۔
ماما کدیر گوشتگ کہ شھیدانی ھونانی برورد اِنت کہ جھان ءَ دلگوش گور کرتگ۔ بلوچ راج ءَ مردمی ھکاں ٹاپار جنوکان ءَ پیش داشتگ کہ بلوچ مر ایت بلے رزوائی ءِ زند ءَ نہ منّ ایت۔
آئی ءَ گوشتگ کہ نوزہ پروری ءِ سھب ءَ بولان ءَ لشکرکشی ءِ میان ءَ جنگی بالگرداں تیرگواری کرتگ ءُ بلوچ پسگ شھید کرتگ اَنت ءُ بازیں کودکیں مردم آوار جتگ ءُ بیگواہ کرتگ اَنت۔
