شال: گریشگ ءِ جھمنند ءُ ماسٹر یونس ءِ آوار جتگ ءُ پہ زورنکاہ کرتگیں جنک سمرینہ ءِ مات بسران شال پریس کلب ءَ شتگ ءُ پریس کانپریس کرتگ۔
آئی گوں اھوالکاراں دلگوش گور کرتگ ءُ گوشتگ کہ گوستگیں روچاں یونس ء ھسن منی جنک آوار جتگ ءُ زور نکاہ کرتگ۔ منی ءُ ھمل ءِ سور نومبر 2004 بوتگ پد ھاوند ءَ مارا زھگے داتگ، ھمل 2010 بیران بوتگ، من وتی زھگ وت رودینتگ، من وتی زھگ مھمد یونس ءِ کر ءَ پمیشکا دیم داتگ کہ یونس مئے ھند ءَ ماسٹرے بوتگ ءُ ھمل ءِ سیاد اِنت۔ من مھمد یونس ءَ زھگ ءِ پس سرپد بوتگ آں ءُ وتی زھگ دیم داتگ۔
آئی ءَ گوشتگ کہ ھمل ءِ میراس ءَ بازیں ڈگار ءُ جاہ ھست، مھمد یونس میراس ءَ دستیگ کنگ لوٹگ ءَ اِنت۔ آئی باز ھیلہ چکاستگ بلے من گوں شیر زالی ءَ وتی زھگ ءُ میراس پھریز اتگ اَنت، پد ءَ آئی نوکیں پندلے ساز اِتگ کہ کجام وڑ ءَ منی زھگ ءَ گوں سور بہ کنت ءُ ڈگاراں دستیگ بہ کنت۔ من آئی اے گپ ءِ اشکنگ ءَ ھیران بوت آں کہ یک پتے ءِ بستار ءَ زھگ ءِ ھیال ءَ دارگ ءَ اِنت زھگ ھم آئی ءَ ابا ابا ءِ نام ءَ توار کنگ ءَ اِنت اے کجام شرم ءِ گپ اِنت کہ آ ھمے زھگ ءِ جود بوگ لوٹ ایت؟ من گوں آئی ءَ ھمے لوٹ کرتگ کہ تو وتی کھول ءِ انچیں مردمے ءِ گون ءَ منی زھگ ءَ سانگ بہ کنت کہ آئی ھم امرے بہ بیت، پد ءَ مھمد یونس ءَ منی زھگ گوں وتی برازتک شھاب ءَ سانگ کرتگ۔
آئی ءَ گوشتگ کہ من پد ءَ سرپد بوتگ آں کہ شھباز اے سانگ ءَ وش نہ اِنت ءُ منی زھگ ءَ نہ لوٹ ایت۔ پد ءَ مھمد یونس ترس آماچ بوتگ کہ نوں اے زمین ءُ جاگہ چہ منی دست ءَ رو اَنت آئی گوں ھندی میر ءُ مھتراں ابدالگنیء الاھی بکش جھمنند بدرنگ گریشگ، ابدرھیم ءُ اکبر ءِ ھواری ءَ منی زھگ آوار جتگ ءُ تربت ءَ برتگ۔ ھمود ءَ یک ملاھے ءِ گس ءَ 16 پروری 2024 ءَ نکاہ کرتگ، زوراکی ھمیش اِنت کہ مئے سور 2004 ءَ بوتگ ءُ آ مردماں منی زھگ ءِ نکاہ ءِ کاگدانی تہ ءَ 2003 نبشتگ کہ نہ تیوک ءَ دروگ بستگ ءُ رد گوشتگ بلکیں آیانی مئے سور ءَ یک سالے پیش منی زھگ ءِ امر پیش داشتگ ءُ من ءَ کمشرپ کرتگ۔
بسران گوشتگ کہ پد ءَ اے زوراکی ءِ بگیری ءَ من ھزدار پریس شتگ ءُ پریس کانپریس کرتگ پریس کلب ءِ واکدار ءَ منی پریس کانپریس ءِ تامربند کور کرتگ۔ وھدے کہ من نال پولیس گس ءَ شتگ آں ایس ایچ ءَ من ءَ زاہ داتگ ءُ چہ ایپ آئی آر ءِ نبشتہ کنگ ءَ مکن کرتگ، پد ءَ من بیست ادراں نال ءَ زھرشانی نندانک داتگ مردمانی زھرشانی دیستگ اَنت ایپ آئی آر نبشتہ کرتگ ءُ میاربار ءِ دزگیر کنگ ءِ دلجمی داتگ، بلے واکدار ءَ زوت میاربار جاھے ءَ نندارینتگ ءُ منی زھگ درکانودی یک ٹکی سردارے ءِ دست ءَ داتگ، ما گوں نال ءِ ایس ایچ سلام ءَ رھوت نہ کرتگ۔
آئی گوشتگ کہ من یک رندے پد ءَ وتی پریات زرتگ ءُ ھزدار پریس کلب ءَ شتگ آں من ءَ واکدار ءَ پریس کانپریس کنگ نہ اشتگ، وھدے من دگ ءِ سر ءَ پریس کانپریس کنگ ءِ جھد کرتگ گڑا پریس کلب ءِ واکدار ءَ لیویز کارمند لوٹائینتگ اَنت ءُ مارا جتگ ءُ گلینتگ، چہ ایشی ءَ پد نال درسرکاری نادراھجاہ ءِ واکدار ءَ منی زھگ ءِ ساڑی نہ بوگ ءَ میاربار ءِ گوشگ ءِ پد ءَ سرٹیپیکٹ جوڑ کرتگ ءُ منی زھگ ءِ امر رد کرتگ۔
بسران ءَ گوشتگ کہ ھمے وڑ ءَ ھند ءِ میر ءُ مھتر، دمگدار درس میاربار ءَ کمک کنگ ءَ اَنت من کج ءَ برواں ءُ منی گپ ءَ کئے گوش دار ایت؟ من گوں ادراھاں دزبندی کناں کہ منی گون ءَ انساپ کنگ ءَ منی زھگ ءَ من ءَ دست ءَ بہ دنت، من نہ تیوک ءَ پہ وتی زھگ ءَ در کپتگ آں من لوٹ آں کہ باند ءَ دگہ ماسے ءِ زھگ ھمے وڑ مہ بیت۔ من گوں درسیں مردم دوست، اھوالکار ءُ گون ءَ درسیں راج ءَ لوٹ کناں کہ پمن توار چست بہ کن اَنت۔
