پسنی: ماتی زبانانی میان استمانی روچ ءِ درگت ءَ بیست ءُ یک پروری ءَ گوس بھار کتبجاہ اورماڑہ ءُ لبزانکی گل اورماڑہ ءِ نیمگ ءَ مبارک کازی ءِ نام ءَ مراگشے برجم دارگ بوتگ۔
دیوان ءِ گچینی مھمان ھیڈ ماسٹر سادک مساپر ءُ ھاجی سلیم بوتگ اَنت۔
دیوان بندات گوں راجی سوت ءَ کنگ بوتگ آئی ءِ تہ ءَ ملالہ گروپ ءَ راجی سوت ءَ را گوں وشگٹی ءَ ونتگ۔
اے مراگش ءِ دو بھرانی ءَ تہ ءَ بوتگ۔ اولی بھر گشتانکی بھر بوتگ کہ آئی ءِ تہ ءَ ماتی زبان ءُ مبارک کازی ءِ ازم ءُ زند ءِ سر ءَ تران کنگ بوتگ۔
اولی بھر ءِ تہ ءَ تنویر زھیر ءَ ماتی زبان ءِ ارزشت ءِ سرا تران کرتگ۔ شازمان شازو ءَ مبارک کازی ءِ زند ءِ سر ءَچمشانک داتگ۔ بانک سگرا ،بانک سھنا، بانک نازین ءَ مبارک کازی ءِ دستونک ونتگ اَنت، الماس سلیم ءَ کازی ساھب ءِ ازم ءِ سر ءَ تران کرتگ اھجاز ازیم ءُ سراج روشن ءَ زبان ءِ ارزشت ءِ سر ءَ تران کرتگ ءُ اولی بھر ءِ گڈسر ءَ مھمان سادک ءَ کازی ساھب ءِ زند ءِ سر ءَ تران کرتگ ءُ ھاجی سلیم ءَ ھم زبان ءِ ارزشت ءِ سر ءَ وتی ھیال درشان کرتگ اَنت۔
مراگش ءِ دومی بھر شائری بوتگ کہ آئی ءِ مھمان گچینی مھمان اسلم شوھاز ءُ جی آر ملا بوتگ اَنت۔
دومی بھر ءِ تہ ءَ شائراں وتی شیئر ونتگ اَنت، شائرانی تہ ءَ مکتیار آکل۔ سنااللہ سناء، امتیاز پراز، مرشد سباء، نوید جمیل، رھمان ازیز، اکبر رپیک، امام بکش تسّور، جاوید امبر، سراج روشن، سالہ اُمرانی۔ آرپ سھر، امیر، سلیم بزگ، اسلم شوھاز، آر۔ بی ملا ءَ وتی وتی شئر دیوان ءِ دیم ءَ ونتگ اَنت۔
دیوان ءِ گوں واجہ مبارک کازی ءِ دستونکے ءَ ھلاس کنگ بوتگ، آ دستونک رھیم اسلم ءَ گوں وشگٹی ءَ گوْشتگ۔
