پسنی: ماتی زبانانی میان استمانی روچ ءَ پسنی ءَ یک مزنیں مراگشے مبارک کازی ءِ نام ءَ برجم دارگ بوتگ۔ مراگش ءِ بندات گوں راجی سوت ءَ کنگ بوتگ ءُ دیمتر ءَ مبارک کازی ءِ یات ءَ دو سھت ءِ بے تواری ءَ پد دیوان ءِ ایدگہ بھر بندات بوتگ اَنت کہ آیانی تہ ءَ تران، پینل ڈسکشن، کسمانک، کتاب دیمدرائی، کتاب میڑہ، ڈاکومنٹری، آرٹ اگزیبیشن، شئیر ءُ شائری ءُ ساز ءُ زیملی ھوار بوتگ اَنت۔
دیوان ءِ مھمان بنجاھی مزن کارگشاد ازھر، بنجاھی پتر ءِ باسک پوزیہ ءُ بالاچ ءَ ھوار منیر مومن، اے آر داد، میر امر میر، زبیر مکتار، ڈولی بیگ، ندیم اکرم، امیر دوست، ھسام، سپیہ، الپ میم داد ءُ کسان سالیں سُھراب بلوچ بوتگ اَنت۔
اولی بھر گشتانک بوتگ کہ آئی ءِ تہ ءَ گل ءِ مزن کارگشاد ازھر، سپیہ، الپ میم داد ءُ ندیم اکرم ءَ بلوچ ءِ ماتی زبان ءُ مبارک کازی ءِ زندءُ ازم ءِ سرھالانی سر ءَ گشتانک داتگ۔
دومی بھر دیوانے گوں منیر مومن ءَ بوتگ کہ آئی ءِ مھمانجل ھسام بوتگ کہ بلوچی زُبان ءُ لبزانک ءِ سرءَ گپ ءُ باوست بوتگ۔
سیمی بھر ءَ “ماتی زبان” ءِ سر ءَ کسمانکے پیش کنگ بوتگ۔ ھمے پیم دیوان ءَ دیم ءَ بران ءَ دیمی بھر ءَ “ماتی زبان” کتابک ءِ دیمدرائی کنگ بوتگ۔ چرائی ءَ رند شئیر ءُ شائری دیوان بوتگ کہ آئی ءِ مھماننجل اے آر داد بوتگ ءُ شائر منیر مومن، زبیر مکتار، ندیم اکرم، امیردوست، میر امر میر، ڈولی بیگ، بوتگ اَنت۔
دیوان ءَ دیمی بھر ءَ مبارک کازی ءُ ماتی زبانانی میان استمانی روچ ءِ درگت ءَ ڈاکومنٹری یے پیش دارگ بیتگ۔ اے بھراں ھوار مراگش ءَ کتاب میڑہ ءُ آرٹ اگزیبیشن ھم برجم دارگ بوتگ، کتاب میڑہ ءَ گل ءِ ماتی زبان ءِ سرءَ نوکیں کتابُک ءُ ایدگہ کتاب ایر کنگ بوتگ اَنت ءُ دومی نیمگ ءَ جتائیں ازمکاراں وتی آرٹ آورتگ ءُ اگزیبیشن ءَ پیش کُتگ اَنت۔
دیوان ءِ گُڈی بھر ساز ءُ زیملی بوتگ ءُ اود ءَ وش گُشیں گشندہ آسمی ءُ نسیب مزار ءَ گوں وشیں توار ءَ سوت الھان کرتگ ءُ پد دیوان سوبمندی ءَ گوں آسر کنگ بوتگ۔
