برتانیہ ءِ ویسٹ منسٹر ھال ءَ لیبر پارٹی ءِ سروک ءُ پارلیمنٹ ءِ باسک جان میکڈونل ءُ آدگہ کارکناں بلوچستان ءَ مردمی ھکانی پادمال کنگ ءِ جاورانی سر ءَ باوست کرتگ ءُ وتی ھیال درشان کرتگ اَنت۔ آیاں بلوچستان ءِ سیاسی، گوستانی ءُ زمینی کچ ءُ کساس ءِ ارزشت ءِ سر ءَ تران کرتگ۔
جان میکڈونل ءَ تران کرتگ کہ اے ایوان ءَ بلوچستان ءِ مردمی ھکانی جاورانی سر ءَ دلگوش دیگ بوتگ کہ بلوچستان ءِ یک جوانیں رزیشتے آ چہ مادن ءَ پُر اِنت۔ اود ءَ بلوچ چہ کرناں آباد اَنت پیمشکا آئی ءِ نام بلوچستان اِنت۔
دیمتر ءَ شینن ءَ تران کرتگ ءُ گوشتگ کہ بلوچ جنینانی گوستانکی روانک ءِ بارو ءَ اش کرتگ کہ آ پاکستانی لشکر ءِ نیمگ ءَ بلوچستان ءَ زوریں بیگواھی، درکانودی کوش، لشکرکشی ءُ بلوچانی بگیری ءَ ریاست ءِ زوراکیانی دارگ ءَ لوٹ اِش کرتگ۔ اے مردمی ھکانی پادمال کنگ بند کنگ بہ بیت۔ ما پہ آیانی ھکانی دیم ءَ آرگ ءَ ھرپیمیں سپارتی جھد ءَ برجاہ دار ایں۔
جان میکڈونل ءَ دیمتر ءَ تران کرتگ کہ مارا منّگ لوٹ ایت بلوچستان ءَ مردمی ھک ناگیگیں وڑے ءَ پادمال کنگ بوگ ءَ اَنت کہ اے پارلیمنٹ ءُ میان استمانی تک ءَ دلگوش دیگ لوٹ اَنت۔ ایمنسٹی انٹر نیشنل ءُ ھیومن رائٹس واچ ءَ اے دمگ ءِ تہ ءَ مزنیں کچے ءَ مردمی ھکانی پادمال کنگ ءِ کیس یاداشت کرتگ اَنت ءُ ایر جتگ۔ اے ادارھاں اے مردمی ھکانی بگیریانی زمہ وار پاکستانی لشکر ءِ نیمگ ءَ اے زوراکی دیم ءَ آورتگ اَنت ءُ لشکری ادارھانی جست گرگ ءِ لوٹ ھم کرتگ۔
آئی ءَ گوشتگ کہ درساں گیش ترسناکیں بھرگ زوریں بیگواھی لیکگ بوتگ پاکستانی لشکر ھمے میارباری ءَ کنگ ءَ اِنت۔ زور بیگواھیں مردم درکانودی آوار جنگ بنت ءُ آیانی ھچ وڑیں ھال نیست کھول ھم سھی کنگ نہ بنت۔ آ بازیں لٹ شاپ ءَ پد کشگ ءُ آیانی لاش چگل دیگ بنت کہ آیانی لاشانی سر ءَ آزارانی نشان ھم گندگ بنت۔
آئی ءَ دیمتر ءَ گوشتگ کہ انوگیں روچاں یک گوستانکی روانکے کشگ بوتگ ایشی سروکی جنیناں کرتگ اے روانک چہ شال ءَ داں اسلام آباد ءَ شتگ۔ اے روانک ءِ مول زوراکیانی بند کنگ ءِ لوٹ بوتگ اے روانک اسلام آباد ءَ ریاست ءِ زوراکیانی آماچ بوتگ۔
اے بارو ءَ لیبر پارٹی ءِ زرہ سلتانہ ءَ بلوچستان ءِ جنینانی ھمت ساڑاتگ ءُ روانک ءِ پلہ مرزی کرتگ ءُ گوشتگ کہ اے روانک ءَ اے دمگ ءِ تہ ءَ پہ مردمی ھکانی بگیری ءِ بارو ءَ زانت بکش اِتگ۔
آئی ء اوگان باھوٹیانی گون ءَ پاکستان ریاست ءِ زواکیانی بارو ءَ وتی ھیال درشان کرتگ اَنت ءُ گوشتگ کہ مارا ھمے ھال سربوتگ باھوٹیانی گون ءَ زوراکی کنگ بوگ ءَ اِنت۔
