بلوچ اسٹوڈنٹس کونسل پنجاب ءَ وتی شنگ کرتگیں درشانے ءَ گوشتگ کہ زبان راجی پجار ءِ چیدگ اِنت بے زبان ءَ راج وھد ءِ ھمرائی ءَ چہ وتی ھستی ءَ گسر کپ اَنت ءُ وھد ءِ مُجان اندیم بنت۔ 21 اُستپان ( پروری ) چہ یونیسکو ءِ نیمگ ءَ ماتی زبانانی میان اُستمانی روچ نامینگ بوتگ اے ھما روچ اِنت کہ وھدے بنگلادیش ءَ ڈھاکہ زانشجاہ ءِ نودربر پہ وتی ماتی زبان بنگالی ءِ رکینگ ءَ زھرشانی کنگ ءَ بنت آیانی سرا اُرش بیت ءُ بازیں نودربرے زبان ءِ رکینگ ءِ جُھد ءَ وتی ساہ ءَ دنت ءُ نمیران بیت۔ ھما شھیدانی جھد ءُ ماتی زبان ءَ پہ مھر ءِ یات ءَ اے روچ ماتی زبانانی میان استمانی روچ ءِ نام ءَ ھمک سال برجم دارگ بیت۔
آئی ءَ گْوشتگ کہ اے روچ ءِ برجم دارگ ءِ سوب ھمیش اِنت کہ راج چہ وتی ماتی زباناں پراموش مہ بنت۔ انچوشکہ دُگنیا گلوبلائزیشن ءِ نیمگ ءَ رؤگ ءَ اِنت اے پہ راجی زبان ءُ دود ءُ ربیدگاں مزنیں تاوانے۔ ھمے تگ ءُ تاچ ءِ میان ءَ بازین راج چہ راجانی بُنیاتی لوٹ بزانکہ زبان دود ءُ ربیدگ ءَ چہ زبھر بؤاں اَنت ءُ آؤکیں وھد ءَ راجے ءِ بستار ءَ نہ مان اَنت۔ بلوچ اے وھدی ھزار دابیں جیڑھانی دیمپان اِنت آیاں چہ بلوچ ءِ زبانانی ھلاس کنگ یا کہ جھل جنّگ ءِ پندل ھوار اَنت۔ پہ بلوچ ءَ المی اِنت کہ وتی تہ ءَ راجی سنچ ءُ سسا ودی بہ کنت ءُ وتی ماتی زبانانی رکینگ ءِ توجیل بہ ساز اِیت۔
آئی ءَ گْوشتگ کہ بلوچ اسٹوڈنٹس کونسل پنجاب یک نودربرے گلے ءِ بستار ءَ مدام پہ بلوچ راج ءِ ماتی زبانانی رکینگ ءُ دیمروئی ءَ وتی وس ءُ واک ءِ کچ ءَ جھد کنت۔ ھمے درگت ءَ بی ایس پنجاب ءِ توامیں ریجنل چیپٹر ءُ کونسل “زبان راجی پجار ءِ چیدگ اِنت “ سرھال ءِ سرا جتا جتائیں مراگش اڈ بہ دئینت ءُ بلوچ نودربران چہ ماتی زبانانی لوٹ ءُ ارزشت ءَ آژناگ بکن اَنت۔
