![](https://zrumbesh.com/wp-content/uploads/2024/02/1000239365-1024x576.jpg)
شال: بیگواھیں بلوچانی توار ( وی بی ایم پی ) ءِ زھرشانی گدان ءَ شال پریس کلب ءِ دیم ءَ 5345 روچ سرجم بوتگ۔ یک شمبے ءِ روچ ءَ جتائیں بھرگاں سیادی داروکیں مردم پہ ھمدردی درشان کنگ ءَ گدان ءَ آتکگ اَنت۔
بیگواھیں بلوچانی توار ( وی بی ایم پی ) ءِ کمک سرکماش ماما کدیر گوں مردماں تران کرتگ ءُ گوشتگ کہ ھدایت لوھار ءِ ناھکیں کوش ءَ ایر جن آں، سورٹ ءُ سسی لوھار ءِ پت ءِ شھیدی ءَ سکا بژن بوت۔ بلوچ، سندھی ءُ پشتونانی چکچینی بوگ ءَ اِنت اے زوراکی ءِ بگیری ءَ مارا ھواری ءَ جھد کنگ لوٹ ایت۔
آئی ءَ گوشتگ کہ بلوچ پہ وتی راجی دودمان، پدریچ ءُ ننگ ءِ پھریزگ ءَ چہ دھکاں مڑگ ءُ وتی ساہ ءُ سرانی دیمونی ءَ دیگ ءَ اِنت۔ ھزارانی کچ ءَ بلوچ پسگ زور بیگواہ کنگ بوتگ اَنت۔
ماما کدیر گوشتگ کہ ریاستی لشکر مردمی ھک ءُ درسیں جنگی راھبنداں لگتمال کنگ ءُ بلوچ، سندی ءُ پشتون پسگاں آوار جنگ ءُ زوراکی کنگ ءَ اَنت۔ ریاستی ادارہ وتی درسیں زوراکیاں پد بلوچ زرمبشت ءِ دارگ ءَ بے سوب بوتگ اَنت۔