سند: سے روچ پیش نسیر آباد ءَ پاکستانی لشکر ءِ جوڑ کرتگیں چیریں ادارھانی کارمندانی تیرگواری ءَ سند ءِ کلانھیں راجدوستیں سروک ءُ وائس پار مسنگ پرسنز آپ سند ءِ سروک سورٹ لوھار ءُ سسی لوھار ءِ پت ھدایت لوھار ءِ کوش ءِ بگیری ءَ سے روچ اِنت تیوگیں سند ءَ زھرشانی برجاہ اَنت۔
سورٹ ءُ سسی لوھار ءِ سروکی ءَ مرچی نیمروچ ءَ نسیر آباد لاڈکانہ شھدگ زھرشانی ءَ بند کنگ بوتگ ھپت ادار ءَ گیش اِنت کہ زھرشانی برجاہ اِنت۔ پولیس ءُ رینجر ءِ کارمند بازیں کچے ءَ آتکگ ءُ مچ بوتگ اَنت۔
زھرشانی نندانک ءِ سروک سورٹ لوھار ءُ واکدارانی میان ءَ گپ ءُ تران ءَ ھمے گوشگ بوتگ کہ شھید ھدایت لوھار ءِ کھول ءِ لوٹانی ھساب ءَ پاکستانی چیریں ادارھانی بگیری ءَ ایپ آئی آر نبیسگ بہ بیت بلے آیانی اے لوٹ منگ نہ بوتگ واکدار زھرشانی ءِ ھلاس کنگ ءَ بے سوب بوتگ اَنت۔
دومی نیمگ ءَ کراچی پریس کلب ءُ ملیر پریس کلب ءِ دیم ءَ سند سجاگی پورم ءُ آدگہ سیاسی، چاگردی ءُ مردمی ھکانی ادارھانی نیمگ ءَ زھرشانی کنگ بوتگ۔
زھرشانیاں سند سجاگی پورم ءِ سروک سارنگ جویو، وائس پار مسنگ پرسنز آپ سند ءِ سروک سھنی جویو، مریم گاڈھی ءُ آدگہ مردماں بازیں کچے ءَ بھر زرتگ۔
