ھزدار: گریشگ ءَ گنی ءِ الاھی بکش نامیں مردمے ءِ سروکی ءَ ماسٹر یونس ء مھمد ھسن ءَ چاردہ سالی جنکے سمرینا آوار جتگ ءُ نکاہ کرتگ۔
بنشون ءِ رد ءَ آوار جنگ بوتگیں جنک سمرینا، بسران نامیں جنوزامے ءِ جنک اِنت کہ آئی پت ھمل بیران بوتگ۔ بلے ھمل ءَ بازیں کچے ءَ زمین ءُ جاگھ ھست۔ ھمل ءِ بیرانی ءَ پد آئی سیاداں باز رند ءَ چہ بسران ءَ ڈگارانی دستیگ کنگ ءِ جھد کرتگ، بسران ڈگار نہ داتگ اَنت۔
آئی گوشگ اِنت کہ یونس ء مھمد ھسن گریشگ ءِ میتگ سریج ءِ جھمنند اِنت ءُ سمرینا ءِ پت ھمل ءِ سیاد اِنت، آئی پمیشکا گوں سمرینا ءَ نکاہ کرتگ کہ ھمل ءِ میراس ءَ دستیگ بہ کنت، بلے بسران ءَ گوشتگ کہ من وتی جنک ءَ اے پنجاہ سالی مردک ءَ دات نہ کن آں۔
ریڈیو زرمبش ءَ سربوتگیں ھالانی رد ءَ آیاں چہ بے سوبی ءَ پد یونس گوں گنی ء الاھی بکش جھمنند بدرنگ گریشگ ءِ سروکی ءَ جنک ءِ آوار جنگ ءِ شور کرتگ۔ ھمے ھپتگ ءَ یونس بسران ءَ رد داتگ کہ من جنک ءَ پہ وانگ ءَ براں، چہ اود ءَ جنک گنی ءِ الاھی بکش، ابدرھیم ءُ اکبر ء نزر ھان ءِ ھواری ءَ آوار جتگ تربت ءَ برتگ ءُ یونس گوں چاردہ سالی جنک ءَ نکاہ کرتگ۔
انچوش گوش بوگ ءَ اِنت کہ تربت ءَ آیان ءَ زامران ءِ جھمنند شے برکت ءِ کمک گوں بوتگ۔
بنشون ءِ رد ءَ آوار جنگ ءُ نکاہ ءَ پد اے درسیں مردم جنک ءِ ھواری ءَ چہ تربت ءَ کراچی ءَ شتگ اَنت یونس ءَ ھوار درسانی نمبر بند اَنت۔
