بلوچ آجوئی لوٹوکیں سروک ابدالنبی بنگلزھی ءَ سندی استاد ءُ راجدوستیں جھدکار ھدایت لوھار ءِ کوش گوں ترندیں دانکاں ایرجتگ ءُ گوشتگ کہ ریاست پاکستان چہ ایردستیں راجانی زانشت ءَ ترس آماچ اِنت پمیشکا شھزانتیں مردماں کشگ ءُ آیاں سیاسی ءُ چاگردی پارست ءَ تھارونکی ءَ تیلانک دیگ لوٹ ایت۔
آئی ءَ گوشتگ کہ ھدایت لوھار پمیشکا کشگ بوتگ آ سندی راج ءُ پہ سندھودیش ءِ نپاں جیڑگ ءَ بوتگ، اے کار زورگریں سرکاراں دوست نہ بیت۔
ابدلنبی بنگلزھی ءَ گوشتگ کہ شھید ھدایت لوھار داں دیریگیں وھدے ءَ بیگواہ کنگ بوتگ ءُ آئی زوریں بیگوھی ءِ میان ءَ آئی ءِ دو شیرزالیں جنکاں سسی ءُ سورٹ لوھار پہ وتی پت ءِ آجوئی ءَ دراجکشیں زرمبشتے برجاہ داشتگ ءُ ھمے زرمبشت دراجکش کرتگ پہ توگیں سند ءِ زوربیگواھیں مردماں ترندیں توارے جوڑبوتگ، مرچی آیانی پت کشتگ ءُ ھمے کلوہ داتگ کہ ریاست پاکستان پہ مردمی ھکاں چست بوتگیں تواراں کدی اوپار کرت نہ کنت ءُ مچی سزا ءِ نشانگ کنت۔
