![](https://zrumbesh.com/wp-content/uploads/2024/02/1000201889-1024x571.jpg)
بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں گْوستگیں روچ ءِ بیگاہ ءِ چار ءُ نیم ءَ کیچ ءِ بنجاھی شھر تربت، گوکدان ءَ سوراپ پُھل ءِ سر ءَ لشکر ءِ پھازداری ءَ برجاھیں کارمندانی سر ءَ ھما وھد ءَ گوں وتکار ءُ ٹوھیں سلاھاں اُرش کُرتگ وھدے آ لشکر ءِ کاروان ءِ پھازداری ءَ سنگر ءَ پُتِرگ ءَ بوتگ اَنت۔
آئی ءَ گوشتگ کہ سرمچاراں پیسر ءَ سنگر گِپتگ ءُ دژمن ءِ آھگ ءِ ودار کُرتگ، انچوش کہ دو کارمند سنگر ءَ پُتِرتگ اَنت، سرمچاراں اُرش کُرتگ یک کارمندے جاھی مُرتگ ءُ یکے ٹپی بیتگ۔
جارکش ءَ گوشتگ کہ اُرش ءَ پد پروش وارتگیں لشکر ءَ داں دیر ءَ لس آبادی ءِ سر ءَ تیر گْواری کُرتگ۔
بی ایل ایپ ءِ جارکش میجر گھرام ءَ اُرش ءِ زمہ واری منّ اتگ ءُ گوشتگ کہ داں بلوچستان ءِ آجوئی ءَ دژمنیں لشکر ءِ سر ءَ اُرش برجاہ بنت۔