پنجاب:جمیئت تلبہ اسلام ءِ کارمنداں پنجاب زانشتجاہ ءَ بلوچ ءُ پشتون نودربرانی سر ءَ اُرش کنک ءَ پد پولیس ءَ پنجاہ ءَ گیش نودربر آوار جتگ۔ زْرمبش اھوالکار ءِ رد ءَ جمئت تلبہ اسلام ءِ کارمنداں بلوچ پشتون نودربرانی سر ءَ بیڑ برتگ ءُ تیرگواری کرتگ۔ بلوچ ءُ پشتون نودربراں زانشتجاہ ءِ تہ ءَ جمییت ءِ کارمندانی زوراکی ءِ بگیری ءَ زھرشانی کرتگ۔
پنجاپ پولیس ءَ نودربرانی سر ءَ بیڑ برتگ بلوچ کونسل ءِ چیئرمین اھسان ءَ ھوار پنجاہ ءَ گیش پشتون ءُ بلوچ نودربر آوار جتگ ءُ بیگواہ کرتگ۔ انگت زانشتجاہ ءِ وابجاہ ءَ بیڑ برگ ءُ آدگہ نودربراں آوار جنگ ءَ اِنت۔
بنشون ءِ رد ءَ نودربر پہ وتی ھمبلانی پد جنگ ءَ پولیس گِس ءَ شُتگ اَنت ءُ جُست کرتگ، پولیس ءِ گوشگ اِنت کہ نودربر اد ءَ نہ اَنت۔ انگت دگہ بازیں بلوچ ءُ پشتون نودربرانی موبائل نمبر بند اَنت۔
انچش گمان کنگ بیت کہ بیگواھیں نودربرانی کچ ھشتاد ءَ گیش اِنت۔ پنجاپ پولیس ءِ زانشتجاہ ءِ وابجاہ ءَ بیڑ برگ انگت برجاہ اِنت۔ چہ جمئیت ءِ کارمندانی بیڑ برگ ءَ بازیں نودربرے زدگ بیتگ۔ رسانکدر ءَ تامربندے شنگ اِنت کہ آئی ءِ تہ ءَ نودربرے ءِ سر ھون اِنت۔
بنشون: اھوالکار | اکس: اھوالکار
