سکر: 28 اپریل 2022 ءَ پاکستانی لشکر ءَ زورانسری بیگواھیں امام بکش ء کالو ھان ابڑو کشتگ ءُ آئی ءِ جون ماں ھیدر آباد ءَ چگل داتگ۔ امام بکش ءِ ژانگولیں جون گوستگیں روچ ءَ کھول ءِ دست ءَ کپتگ۔
سند ءَ چو بلوچستان ءِ وڑ ءَ جاور ناگیگ اَنت ءُ زورانسری آوار جنگ ءِ تہ ءَ گیشی گندگ بیگ ءَ اِنت۔
گوستگیں لھتیں روچ بیت کہ زورانسری بیگواھیں مردمانی جون دز کپگ ءَ اَنت، چہ آیاں بازینے ءِ پجار بیگ ءَ نہ اِنت۔
پہ دست کپتگیں جونانی باروا ھمے گوشگ بیگ ءَ اِنت کہ اے پاکستانی لشکر ءِ دست ءَ زورانسری آوار جنگ بیتگیں مردمانی اَنت کہ آ گوں راج دوستی ءِ لیکہ ءَ بندوک اَنت۔
وائس پار مسنگ پرسنز آپ سند ءِ رد ءَ گوستگیں روچاں چہ جتاھیں جاھاں درزنانی کچ ءَ سندی راجدوستیں کارکنانی جون دزکپتگ اَنت کہ پاکستانی لشکر ءُ چیریں ادارھانی کارمنداں زورنسری آوار جنگ ءَ پد بیگواہ کرتگ اَنت۔
سند ءَ ھم چو بلوچستان ءِ وڑ ءَ دیر اِنت کہ مردمی اگبالانی ادارہ پہ زورانسری بیگواھیں مردمانی پد جنگ ءَ زھرشانی کنگ ءَ اَنت۔
گوستگیں روچاں کراچی ءُ سند ءِ آدگہ جاھاں بازیں بلوچے زورانسری آوار جنگ ءَ پد بیگواہ کنگ بیتگ، چہ سرکاری ادرھانی نیمگ ءَ بیگواھیں مردمانی کھول ترسینگ بیتگ اَنت ءُ آیاں وتی بیگواہ کنگ بیتگیں مردمانی ھال رسانکدر ءَ شنگ نہ کُرتگ اَنت۔
بنشون: اھوالکار | اکس: اھوالکار
