بلوچستان آجوئی سنگر ( بی ایل ایپ ) ءِ جارکش میجر گھرام ءَ ماں رسانکدر ءَ وتی شنگ کرتگیں درشانے ءَ گوشتگ کہ سرمچاراں تربت، ڈنک ءَ زورگریں پاکستانی لشکر ءِ یک کاروانے نشانگ کُرتگ، اُرش ءَ دژمنیں لشکر ءِ دو کارمند مُرتگ ءُ سَے ٹپی بوتگ۔
آئی ءَ گوشتگ کہ بی ایل ایپ ءِ سرمچاراں ھشت پروری ءَ کیچ ءِ بنجاھی شھر تربت ءِ ڈنک ءَ شاھزئی پمپ ءِ نزیک ءَ سنگر گِپتگ ءُ زورگریں پاکستانی لشکر ءِ کاروان ءِ سر ءَ گوں ٹوھین ءُ نوکیں سلاھاں اُرش کُرتگ۔
جارکش ءَ گوشتگ کہ کاروان ءِ ھواری ءَ دژمنیں لشکر ءِ یک سروگانے ھوار بوتگ، سرمچاراں ھمے گاڑی نشانگ کُرتگ کہ چہ ایشی ءَ دُژمنیں لشکر ءِ دو کارمند جاھی مُرتگ ءُ سَے ٹپی بوتگ ءُ یک گاڑی یے ءَ تاوان بوتگ۔
آئی ءَ گوشتگ کہ اے اُرش ھشت پروری ءَ وتگڑیں پاکستان ءِ گچینکاری ءِ روچ ءَ بوتگ،بلے اے روچ ءَ دُژمن ءَ دامگ ءُ نٹورک بند کُرتگ اَنت پمشکا اے کار شنگ کنگ نہ بوتگ۔
جارکش ءَ گوشتگ کہ اے اُرش ءَ پاکستانی لشکر ءِ مُرتگیں کارمندانی نام چاگردی رسانکدر ءَ شنگ بوتگ اَنت کہ چہ ایشاں یکے امیر نزام پور ءِ جھمنند سھیل اکتر اِنت ءُ یکے ءِ نام سیپ الرھمان اِنت کہ اگزر ھیل ءِ جھمنند اِنت۔
بی ایل ایپ ءِ جارکش میجر گھرام ءَ اُرش ءِ زمہ واری منّ اتگ ءُ گوشتگ کہ داں سرجمیں بلوچستان ءِ آجوئی ءَ زورگریں پاکستانی لشکر ءِ سر ءَ سرمچارانی اُرش برجاہ بنت۔
