بلوچ اسٹوڈنٹس ایکشن کمیٹی تونسہ ھنکین ءِ دیوان گل ءِ مزن کار گشاد ازھر ءِ سروکی ءَ برجم دارگ بوتگ۔ دیوان ءِ گچینی مھمان بُنجاھی کُمک کارگُشاد مھمد بوتگ۔ دیوان ءِ بُن گپ بُنجاھی سرکیولر، گوستگیں بنزھی اھوال، نگد کاری، گل کاری، ھندی ءُ میان استمانی سیاسی جاورھال ءُ آؤکیں گامگیج بوتگ اَنت۔
دیوان ءَ جتائیں بُنگپانی سرءَ تْران کنان ءَ بُنجاھی سنگتاں گوْشتگ کہ گل ءِ گل کاری(تنظیم سازی) شاھگان بوان اِنت ءُ گل ءَ مرچی بلوچستان ءِ گیشتر ھند ءُ دمگاں وتی اسٹریچکر پھال کرتگ اَنت۔ چوشکہ گوستگیں باریگ ءَ ھاران ھنکین ءِ جوڈ بوگ ءُ نوں تونسہ شریپ ءِ نیام ءَ گل ءِ ھنکین ءِ جوڑ کنگ بلوچ نودربر سیاست ءِ تہ ءَ جوانیں گامگیجے۔ بلوچستان ءِ ھند ءُ دمگاں گل ءِ نوکیں ھنکینانی جوڑ بوگ ءَ گل ءِ پروگرام بلوچستان ءِ کُنڈ کُنڈ ءَ سر بوت کنت۔ گل ءِ سرجمیں بلوچستان ءَ سر کنگ ءُ کُلیں بلوچ نودربراں یک پتّرے ءِ سرءَ یکجاہ کنگ ءِ شوندات سر ءَ دلجمی ءَ گوں جھد بوگ اِنت۔ بلوچ نودربراں یک پتّرے ءِ سر ءَ یکجاہ کنگ ءُ آھاں سیاسی ءُ زانشتی ھیلکاری کنگ راج ءِ لوٹانی ھواری ءَ مئے زمہ واری اِنت کہ آئی ءَ گل وھد ءِ ھمراھی ءَ سرجم کنان اِنت۔ بساک ھما پروگرام ءَ نودربراں سر کنگ ءَ اِنت کہ آ وھد ءُ بلوچ نودربر سیاست ءِ لوٹ اِنت ءُ گل ءِ راھبند ءِ سرءَ بلوچ ورنا کار کنگ ءَ جاڑیگ اَنت۔
دیمتر ءَ تْران کنان ءَ سنگتاں گوْشتگ کہ تونسہ بلوچستان ءِ ھما ھند اِنت کہ اُود ءَ نوْد ءَ گیش درسد آبادی بلوچ اَنت۔ بلوچستان ءِ گیشتر ھند ءُ دمگ سرکاری ڈالچاریانی سوب ءَ سیاسی زانت ءُ زانشت ءِ پڑ ءَ نزور انت ءُ ھستیں وانگی نزام ءِ سوب ءَ مھلوک بلوچ گوستانک ءُ بلوچ سیاست ءَ چہ گِستا اَنت۔ بلوچستان ءِ گیشتر ھند ءُ دمگ زمینی بنیات ءَ چہ گلزمین ءَ سندگ بوتگ اَنت ءُ دومی نیمگ ءَ چہ بلوچ سیاست ءَ دور کنگ بوتگ اَنت۔
آیاں تْران کنان ءَ گوشتگ کہ تونسہ ھنکین ءِ سنگت دْرست وانشجاہ ءِ نودربر اَنت ءُ اے پہ بلوچ نودربر سیاست ءَ جوانیں گامگیجے۔ اے پہ نودربر سیاست ءَ ھژدری انت کہ مارا وانشجاہ ءُ وانگجاہ ءِ نودربراں سیاسی زانت ءُ زانشت ءِ سر کنگ بندات کنگی اِنت۔ پہ بلوچ نودربر سیاست ءَ الّم اِنت کہ گل ءِ پہ ھرچ تبک ءِ نودربرانی یکجاھی ءُ آھانی وانگی، سیاسی ءُ زانشتی ھیلکاری یک مھکمیں رنگے ءَ برجم دارگی اِنت۔
جتائیں بُنگپانی سرءَ دلجمی ءَ تْران ءَ پد آؤکیں گامگیج ءِ بُنگپ ءَ تونسہ بُنزہ ھلاس کنگ بوتگ ءُ بساک تونسہ ھنکین جوڑ کنگ بوتگ۔ نوک گچین بوتگیں ھنکین ءَ مزھر بلوچ ھنکین ءِ کارمستر، ازگر کُمک کار مستر، سراج کارگُشاد، سجاد کُمک کار گُشاد ءُ امر بلوچ ھالرسانی کارگُشاد گچین کنگ بوتگ اَنت۔
گُڈسر ءَ نوک گچین بوتگیں سنگت سوگند دیگ بوتگ اَنت آئی ءَ پد ھنکین ءِ دیوان ھلاس کنگ بوتگ۔
