بلوچ اسٹوڈنٹس ایکشن کمیٹی ھاران ھنکین ءِ نیمگ ءَ یک ھیلکاری دیوانے ھنکین ءِ آرگنائزر ادنان ءِ سروکی ءَ برجم دارگ بوتگ۔ دیوان ءِ گچینی مھمان ءِ بنجاھی سرکماش شبیر ءُ بنجاھی ھالرسانی کارگشاد ازیر بوتگ اَنت۔
دیوان ءِ سرھال: نیشن اینڈ نیشنلزم، بلوچ نیشنلزم بوتگ، اے بنگپ ءِ سر ءَ بنجاھی سرکماش شبیر ءُ بنجاھی ھالرسانی کارگشاد ازیر ءَ تران کرتگ
اے دیوان دو بھرانی تہ ءَ بوتگ، اَولی بھر ءَ سنگت ازیر ءَ راجدوستی ءِ درگت ءَ جتا جتائیں زانتکارانی لیکہ پیش کُرتگ اَنت کہ آھانی لیکہ راج ءَ چونیں بزانت بکش اَنت۔
سنگت ءَ تران کنان ءَ گوْشتگ کہ جتائیں زانتکار ءُ رھشوناں وتی زمینی راستیانی ھساب ءَ وتی راج ءِ بزانت گشینتگ اَنت۔ چوشکہ ارنیسٹ رینین گوْش ایت کہ راج یک روھانی شئے ءُ مارشتانی بنیات ءَ مھلوک ءِ یکجاھی اِنت۔ آ گوشیت کہ یک راجے ءِ گوْست ءُ ھستے بیت، گوْست ءِ تہ ءَ آئی ءِ یات بنت کہ ھما راج ءِ جنگ، نند ءُ نیاد ءُ زند ءِ ایدگہ پِڑ ءِ کار ھوار اَنت ءُ آئی ءِ یاتانی تہ ءَ بامردانی مزنیں کردے کہ راجی جھد ءِ تہ ءَ وتی کرد پیلو کتگ۔ دومی ھست اِنت کہ یک راجے چوں وت ءَ ھست ءَ گشینیت ءُ یک ءُ دومی ءَ گوں نزیک بیت۔ بزاں ما چوش گوشت کن ایں کہ یک راجے گْوست ءِ یاتانی وسیلہ ءَ روھانی بنیات ءَ وت ءَ دیم ءَ کاریت ءُ مھکم کنت۔
دیمتر ءَ سنگت ءَ تران کُرتگ کہ اسٹالن ءِ گوشگ اِنت کہ راجے ءِ بنگیجی بنداتی لوٹ راجمان اِنت۔ راج مردمانی راجمان گوشگ بیت۔ راج سَلّھیں مردمانی راجمان اِنت۔ اے راجمان چہ نسل ءُ ٹکی جیڑھاں پلگار اِنت۔ اسٹالن چار دیگہ شئیانی سر ءَ زور دنت کہ آھانی پُکار پہ راج ءِ جوڑ بوگ ءَ ارزشت دار اَنت۔ آ شئے ایش اَنت لس زبان(Common Language) لس زمین (Common Land) مالی سیادی (Economic Relations) ءُ تب ھواری (Psychological Make-Up) راجمان ءِ مردمانی نیام ءَ یک لس زبانے بہ بیت چہ ایشی ءَ راجمان ءِ تہ ءِ مردم وت ءَ یکے دومی ءَ گوں یک کُرت کن اَنت۔ اگاں اے مردمانی نیام ءَ لس زبانے نہ بوت گُڑا ایشانی نیام ءَ لس زمینے بہ بیت۔ اے مردمانی سیادی چہ ھمے یکیں زمین ءَ بہ بیت۔ اے زمین ءِ سر ءِ نندوکیں مردمانی زند ءِ نیام ءَ مالی سیادی ءُ بندوکی ھم راج ءِ جوڑبوگ ءِ لوٹے بوت کنت۔
ھمے وَڑا سنگت ءَ Max Weber ءِ لیکہ ءِ سر ءَ تران کُرت ءُ گوْشتگ کہ پہ راج ءِ جوڑ بوگ ءُ گِندگ ءَ بازیں شئے یے دیم ءَ کئیت اِنت چوشکہ زبان، مذھب، نسل، دودمان، مال، ءُ استان۔ بلئے راج ءِ بزانت چہ زبان، مذھب، نسل، دودمان ءُ مالءَ نہ اِنت ءُ نئیکہ استان اِنت۔ بگندئے لبز “راج” ءِ سیادی گوں سیاست ءَ اِنت۔ راج یک مارشتی راجمانے۔ آ وتی ھاتر ءَ پہ وت یک تبے جوڑ کنت۔ میکس ویبر ءِ ھساب ءَ راج مارشت ءِ بنھشت ءِ سر ءَ مالی بُنزہ (Economic Origin) ءِ سان (influence) نیست اِنت۔ راج ءِ بزانت ءِ لبز ءُ ھیال چہ آ مردم ءَ زورگ نہ بیت کہ آ گوں راجے ءَ بندوک اَنت۔ راج ءِ بزانت پہ ھما مردماں زورگ بیت کہ آ راجی مارشتانی یکجاھی ءَ دارگ ءُ درامدیں تاکتانی دیم ءَ دارگ ءَ اَنت۔ اے پیم ءَ راج ءِ ھیال ءِ وتی کدر (Values) ھست اَنت۔
آئیءَ گُڈسرءَ گوْشتگ کہ یک راجے وت ءَ وت بزانت بہ دنت چوشکہ کونر نامیں زانتکارے ہم گوش ایت کہ دیگہ راج یا تاکت ءَ ترا راج ءِ بزانت مہ دنت بلکیں تو وت ءَ وت بزانتے بہ دئے ءُ وتی راج ءَ وت بہ گشین ایت۔
دیمتر ءَ بلوچ راج ءِ سرءَ سنگت ءَ تران کرتگ ءُ گوشتگ کہ بلوچ راج چہ گوْست ءَ جوڈ بوتگیں راجے کہ آ روھانی دروشم ءَ یک ءُ دومی ءَ بندوک اِنت۔ بلوچ ءَ وتی جتائیں زمین ءُ پجارے ھست کہ آئی راجے ءِ بوگ ءِ درور اَنت۔ بلوچ ءِ ڈیھ مدام دریں تاکتانی ایردست بوتگ پمیشکا آئی ءَ وتی پاداں اوشتگ ءِ موھ نہ رستگ بلے بلوچ داں روچ ءِ مرچی وتی راجی جوڈشت ءِ ھاتر ءَ جھد کنگ ءَ اِنت۔ بلوچ ءَ وتی راجی بزانت گشینتگ کہ آ زمین ءُ دوداں گوں بندوک اِنت۔ اے دمگ ءِ تہ ءَ بلوچ ءِ گشیتگیں زمینے ءُ پجارے ھست چہ ایدگہ راج ءُ مھلوک ءَ جتا اِنت۔ بلوچ ءَ وتی راجدوستی وت گشینتگ ءُ آئی ءِ مھکم ءُ سرجم کنگ ءَ جھد ءَ اِنت۔
دیوان ءِ تہ ءَ بلوچ راج دوستی ءِ سر ءَ سرجمیں تک ءُ پھناتانی سر ءَ دلجمی ءَ گوں گپ ءُ تران ءَ پد دیمتر ءَ جست ءِ بھر ءِ تہ ءَ دیوان ءَ نشتگیں ورنایاں جُست کرتگ ءُ پسوانی دیگ ءَ پد دیوان آسر کنگ بوتگ۔
