سند: پنچ سال ءَ بیگواھیں راجدوستیں سروک ایوب کاندڑو ءِ بچ سجاد ایوب کاندڑو بیگواہ کنگ بیتگ۔
وائس پار مسنگ پرسنز سند ءَ اے وئیل راست کرتگ ءُ گوشتگ کہ گوستگیں دو روچ اِنت کہ سجاد ایوب بیگواہ اِنت۔
سجاد ایوب ءِ سیاداں کاسم آباد ءَ پکوڑا اسٹاپ ءَ جُست کرتگ۔
چم دیستیں مردمانی گوشگ اِنت کہ 16 جون ءِ شپ ءَ سجاد ایوب پکوڑا اسٹاپ ءَ چہ وتی سنگتے ءِ پرپٹ ءَ ایر کپتگ ءُ دگہ سنگتے ءِ ودار ءَ بیتگ کہ رینجر ءِ یک گاڑی یے اَبید ءِ نمبر پلیٹ ءَ آتکگ ءُ اوشتاتگ۔
سجاد ایوب ءِ چم بستگ اَنت ءُ گاڑی ءَ سوار کرتگ۔
سجاد ایوب کاندڑو ءِ گھار ماروی کاندڑو ءَ گوشتگ کہ مئے لوگ پرسیگ اِنت۔ یکے چہ پنچ سال ءَ منی پت بیگواہ اِنت، انّی منی کستریں برات سجاد بیگواہ کنگ بیتگ۔ بیگواھیں سجاد ایوب سند زانشجاہ ءِ راجکاری سائنس ءِ پائنل ایئر ءِ نودربرے۔
گوستگیں پنچ سال بیت کہ پہ وتی بیگواھیں پت ایوب کاندڑو ءِ آجوئی ءَ توار چست کنگ ءَ بیتگ۔
کھول ءِ گوشگ اِنت: ما چہ مزن آمیدگس ءُ گوں مردمی اگبالانی تْرامگیجاں دزبندی کنیں کہ مئے گوں ءَ سرکاری ترامگیجانی نیمگ ءَ بوکیں زوراکی ءِ جُست ءَ بہ کن اَنت۔ مئے پِت ءُ برات ءَ چہ سرکاری آزارجاھاں آجو بہ کن اَنت۔
دومی نیمگ ءَ پہ بیگواھیں سندیاں توار چِست کنوکیں گَل وائس پار مسنگ پرسنز سند ءَ وتی شنگ کرتگیں درشانی ءَ گوشتگ کہ سرکار پہ زانت سند ءَ نوکیں بنگلادیش جوڑ کنگ ءِ نیمگ ءَ برگ ءَ اِنت۔
سند ءَ پیسر ءَ سدانی کچ ءَ راجکاری ءُ چاگردی سروک جُھدکار آوار جنگ ءُ بیگواہ کنگ بیتگ اَنت۔ انگت دگہ یک بیگواھیں پتے ءِ ایوب کاندڑو ءِ بچ سجاد کاندڑو بیگواہ کنگ بیتگ۔
ما ایشی ءَ ایرجن ایں۔ کنوینئر سورٹ لوھار ءَ گوشتگ: وائس پار مسنگ پرسنز سند سجاد ایوب کاندڑو ءَ ھوار پہ کلیں بیگواھیں مردمانی آجوئی ءَ 20 جون ءَ شکار پور ءَ روانک کش ایت، سرجمیں سند ءَ زھرشانی ءِ زرمبشتے برجم دارگ بیت۔
