گزہ: اسرائیل ءِ نیمگ ءَ گزہ ءِ الاھلی نادراھجاہ ءَ بمبگواری ءَ زھگ ءُ جنیناں ھوار سدانی کچ ءَ مردم بیران بوتگ۔
پلستین ءِ جاندراھی تک ءِ گوشگ اِنت کہ بمبگواری ءِ بندات ءَ پنچ سد مردم بیران بوتگ ءُ انچوش گمان بوگ ءَ اِنت کہ بیران بوتگیں مردمانی کچ گیشتر بیت۔
اے بابت ءَ جھانی رسانکدر ءِ گوشگ اِنت کہ بیران بوتگیں مردمانی کچ نوہ سد ءَ گیش بوتگ، پنچ سد ءَ گیش مردم ٹپی بوتگ۔ بیران ءُ ٹپی بوتگیں مردمانی تہ ءَ نادراھجاہ ءِ ڈاکٹر ءُ آدگہ کارکن ھوار اَنت۔
الاھلی نادراھجاہ ءِ واکدار ءِ گوشگ اِنت کہ 14 اکتوبر ءَ اسرائیل ءِ راکٹ اُرشانی آسر ءَ نادراھجاہ ءِ چار کارکن بیران بوتگ۔
گزہ نادراھجاہ ءِ نوکیں بمبگواری ءَ بوتگیں تاوانانی سر ءَ ایران، گتر، لبنان، ترکی ءُ کینڈا ءَ بژن درشان کرتگ ءُ ایر جتگ۔
بنشون: جھانی رسانکدر/ اکس: دامگ
