بلوچ راجی زرمبشت ( بی این ایم ) یو کے تک ءِ دیوان لندن ءَ بلوچ راجی ءُ گھگیری شائر نمیرانیں مبارک کازی ءِ یات ءَ برجم دارگ بیتگ۔ دیوان بی این ایم یو کے تک ءِ سرکماش ماسٹر منزور ءِ سروکی ءَ برجم دارگ بیتگ۔ دیوان ءِ گچینی مھمان بنجاھی پتر ءِ باسک نیاز بیتگ۔
دیوان ءِ بندات گوں بلوچ راجی شھیدانی یات ءَ دو دمان ءِ بے تواری ءَ کنگ بیتگ۔ بے تواری ءَ پد پجاری دیوان بندات بیتگ بی این ایم یو کے تک ءِ کلانھیں کارکن ءُ نوکیں کارکنانی یکجاھی ءَ کارکنانی یکے دومی ءِ گون ءَ پجار کنگ بیتگ اَنت۔ پجاری دیوان ءَ پد یوکے تک ءِ جتائیں بنزھانی سروکاں وتی بنزھانی گزارش پیش کرتگ اَنت۔
دیوان ءَ بنزھانی نیمگ ءَ کرتگیں درسیں کار سرجم ءَ دیوان ءَ پیش کنگ بیتگ اَنت۔ بنزھانی گزارشانی پیش کنگ ءَ پد یوکے تک ءِ گھبودی کارکشاد نسیم اباس یوکے تک ءِ مالی بنگپ ءِ بارو ءَ دیوان ءَ یک گزارشے پیش کرتگ۔ گھبودی گزارش ءَ پد شرگداری بندات کنگ بیتگ درسیں کارکناں شریں وڑے ءَ بھر زرتگ ءُ گل ءِ بنگپ ءَ ھوار یوکے تک ءِ پیشیگیں کارانی سر ءَ شرگداری جُست ءُ پرس بیتگ۔
شرگداری دیوان ءَ پد بی این ایم ءِ بنجاھی پتر ءِ باسک نیاز، پھیم ءُ بی این ایم ءِ اگدھدار ھسن ءَ کارکنانی جُستانی پسو داتگ اَنت۔ شرگداری دیوان ءَ پد یو کے تک ءِ آھوکیں گامگیج ءِ بندات کنگ بیتگ اے دیوان ءَ درسیں کارکناں وتی شور داتگ اَنت ءُ ھمے شورانی رد ءَ آھوکیں کارانی کول کنگ بیتگ۔ دیوان ءِ گُڈی ءَ یوکے تک ءِ سرکماش ماسٹر منزور بلوچ راجی ءُ گھگیری شائر مبارک کازی ءِ زندگی ءِ بارو ءَ چمشانک داتگ ءُ ستک شانی ندر کرتگ ءُ گوشتگ کہ گوستانک ءَ مدام ھما مردم زندگ داشتگ اَنت کہ ھما مردماں گرانیں ساھتاں وتی کار ءُ لیکہ ءِ رد ءَ چاگرد ءِ پگری رھشونی کرتگ۔ مبارک کازی ھم یک انچیں گرانبھائیں ھستی یے بیتگ آئی ءَ ناگیگیں جاورانی تہ ءَ وتی شائری گون ءَ پہ بلوچ راج ءُ زبان ءَ جپاکشی کرتگ۔
بنشون: درشان / اکس: بی این ایم
