کائونٹر ٹیررزم ڈیپارٹمنٹ (سی ٹی ڈی ) ءَ ماں رسانکدر ءَ وتی یک پوسٹے ءَ نبشتگ کہ چہ 31 جنوری ءَ داں 8 پروری بی ایل اے، براس ءُ بی آر اے ءَ پہ گچینکاری ءِ دارگ ءَ 130 ءَ گیش اُرش کرتگ۔
سی ٹی ڈی ءَ دیمتر ءَ نبشتگ کہ چہ اے اُرشاں ابید مردم انگت ءَ پہ گچینکاری ءَ گساں در کپتگ اَنت۔
یات بہ بہ اِت کہ بلوچستان ءَ وتگڑیں پاکستان ءِ گچینکاری ءِ چست ءُ ایراں بلوچ سلاہ بندیں گلانی ھم سنتیں گل بلوچ راجی آجوئی سنگر ( براس ) ءَ گوستگیں دو ھپتگانی تہ ءَ 161 اُرش کرتگ۔ چہ ایشی ءَ ابید بلوچ آجوئی لشکر ( بی ایل اے) ءَ تیوک ءَ ھشت پروری 43 اُرش کرتگ۔
بلوچستان ءِ گیشتریں جاھاں گچینکاری نہ بوتگ اگاں کمیں جاھاں بوتگ گڑا چہ سلاہ بندیں گلانی اُرشانی سوب ءَ ترس آماچ بوتگ ءُ گچینکاری جاہ بند کنگ بوتگ اَنت۔
بلوچستان ءَ وتگڑیں پاکستان ءِ گچینکاری ءِ بے سوبی ءِ پُژدر ءَ دامگ ءُ نیٹورک ھم بند کنگ بوتگ اَنت۔ گچینکاری ءِ روچ ءَ دامگ ءُ موبائل نیٹورکانی بندی ءِ درگت ءَ ایمنسٹی انٹرنیشنل زرباری ایشیا ءَ پاکستان ایر جتگ۔
بلوچستان ءَ وتگڑیں پاکستان ءِ گچینکاری ءِ بگیری ءَ سلاہ بندیں گلانی اُرشاں ابید زھگ ءُ جنیناں زھرشانی کرتگ اَت۔ گواک ءُ کونشکلات ءَ گچینکاری جاھاں ووٹ ءِ پیتی پروشتگ ءُ کاگد مانداشتگ اَنت۔
