جاؤ/ نوندڑہ/ پیراندر/ سُکن: بلوچ سرمچاراں مردماں ءَ وتگڑیں پاکستان ءِ گچینکاری ءَ روگ ءَ نہ اشتگ اَنت۔
اھوالکار ءِ رد ءَ زی ھشت پروری ءَ بلوچ سرمچاراں جاؤ ءِ لال باز ءُ سستگان ءَ برز ءِ میتگانی مردم زی سھب ءَ داں بیگاہ ءَ گچینکاری ءَ روگ ءَ نہ اِشتگ ءُ داشتگ اَنت۔
ھمے وڑ ءَ نوندڑہ ءَ بازیں جاھانی مردم چہ گچینکاری ءَ روگ ءَ دارگ بوتگ اَنت۔ نوندڑہ ءَ سردار ازیم مھمد میتگ ءِ گچینکاری جاہ ءَ مردماں زھرشانی کرتگ ءُ گچینکاری جاہ ھلاس کرتگ۔
بنشون ءِ رد ءَ زی پیراندر آواران ءِ بازیں میتگانی مردم چہ وتگڑیں پاکستان ءِ گچینکاری ءَ روگ ءَ دارگ بوتگ اَنت۔ سرمچاراں بازیں جاھاں راہ بستگ اَنت۔ پیراندر ءَ ھمے میان ءَ کچ ءُ ڈل بیدی ءِ میانجی ءَ پاکستانی لشکر ءِ پیادگیں کارمندانی سر ءَ ترندے اُرشے بوتگ۔
اھوالکار ءِ رد ءَ زی واشک ءِ ھند سُکن ءُ ہنجگور ءِ ھند گچک ءِ بازیں جاھانی مردم بلوچ سرمچاراں گچک کھن ءَ گچینکاری ءَ روگ ءَ نہ اِشتگ اَنت۔
یات بہ بہ اِت کہ زی وتگڑیں پاکستان ءِ گچینکاری روچ ءَ بلوچستان ءِ بازیں ھند ءُ دمگاں نیٹورک ءُ دامگ بند کنگ بوتگ اَنت۔ ھمے سوب ءَ بازیں ھال مارا دیر ءَ سر بوگ ءَ اَنت۔
